აქცია ბსუ-ს ეზოში
ბათუმში, შოთა რუსთაველის სახელმწიფო უნივერსიტეტის, ხელოვნების უნივერსიტეტის და საზღვაო აკადემიის სტუდენტთა და ლექტორთა დიდი ნაწილი გაიფიცა. ისინი ქუჩაში გამოვიდნენ და მთელი დღის განმავლობაში, მსვლელობას მართავდნენ.
თავდაპირველად გაფიცვის შესახებ გადაწყვეტილება ხელოვნების უნივერსიტეტმა გამოაცხადა. სტუდენტები და ლექტორები დილით უნივერსიტეტის ფოიეში შეიკრიბნენ, განცხადებები გააკეთეს და მოგვიანებით ბსუ-ს ეზოში გადაინაცვლეს.
“სტუდენტები არ ვაპირებთ გაჩერებას, არ დავიღლებით. არ გვსურს ასეთ ვითარებაში სწავლა. იქამდე გაგრძელდება ეს პროტესტი, ვიდრე თითოეული სტუდენტი არ შემოგვიერთდება. ღამეებს გავათენებთ თუ საჭირო გახდება. ძალიან დიდი როლი გვაქვს სტუდენტებს, ჩვენზე დგას ეს ქვეყანა. სტუდენტი არის დიდი ძალა, რომლისაც ეძინია ხელისუფლებას,” – განაცხადა ჩვენთან საუბრისას ხელოვნების უნივერსიტეტის სტუდენტმა მარიამ მღებრიშვილმა.
ბსუ-ში კი, 1000-ზე მეტი სტუდენტი და 100-მდე ლექტორ, პროფესორი გაიფიცა. ისინი უნივერსიტეტის ეზოში შეიკრიბნენ, სადაც ერთ საათზე მეტხანს სიტყვით გამოსვლები იყო. შეკრებილებმა ევროკავშირში გაწევრიანების პროცესის 2028 წლამდე შეჩერების შესახებ საქართველოს ხელისუფლების გადაწყვეტილებას გააპროტესტეს.
სტუდენტების გაფიცვას არ შეუერთდა თვითმმართველობის თავმჯდომარე, მიზეზი ლიკა დიასამიძემ ჩვენთან არ განმარტა. ის აქციის მიმდინარეობისას ლექციებს არ ესწრებოდა და ეზოში გამოსული, გაფიცული ასობით სტუდენტის მისამართით ცინიკურ რეპლიკებს სკანდირებდა.
„არჩევნების გაუქმებას ვითხოვთ, ხელახლა უნდა ჩატარდეს სამართლიანი და ობიექტური არჩევნები. სტუდენტებთან ერთად პროფესორებიც არიან, სკოლის მოსწავლეებიც შემოგვიერთდნენ. ჩვენი ყველას ერთად გასაკეთებელია ეს საქმე, რათა ბოლომდე მივიყვანოთ ევროკავშირში გაწევრიანების საკითხი. რუსული რეჟიმი თავის მეთოდებით უნდა გავისტუმროთ ხელისუფლებიდან“, – განაცხადეს სტუდენტებმა.
სტუდენტებმა და ლექტორებმა მოგვიანებით მსვლელობით, რუსთაველის ქუჩის გავლით, საზღვაო აკადემიასთან გადაინაცვლეს, სადაც მათ უნივერსიტეტის შესასვლელი ჭიშკარი ბოქლომით დაკეტილი დახვდათ. სტუდენტების ძალისხმევით ჭიშკარი მალევე გაიხსნა და ისინი შენობასა და ეზოში შევიდნენ. აქციის მონაწილეები სკანდირებდნენ “დამოდით”, “შემოგვიერთდით” “არა რუსულ კანონებს”.
„ძალიან მნიშვნელოვანია, რომ უამრავი სტუდენტი და პროფესორი არის ჩართული გაფიცვაში. არ გვჭირდება გაუნათლებელი პრეზიდენტი, არ გვინდა რუსული რეჟიმი, გამოდით ხალხო და დაიცავით ჩვენი კონსტიტუცია,”- აღნიშნეს სტუდენტებმა.
საზღვაო აკადემიიდან სტუდენტებმა აჭარის მთავრობის სამინისტროებთან გადაინაცვლეს, სადაც საჯარო მოხელეებს გაფიცვისა და სოლიდაროებისკენ მოუწეოდეს.
„განათლების სამინისტრო პედაგოგებს პარტიულ აგიტაციას უტარებს. მივმართავთ განათლების მინისტრს მაია ხაჯიშვილს, თავი დაანებეთ პედაგოგებს! გაუმარჯოს თავისუფალ ევროპულ საქართველოს. ბიძინა ივანიშვილს ეგონა, დავიღლებოდით, ჩვენ არ დავიღლებით. განათლების სამინისტროსთან არ არის ევროკავშირის დროშა გადმოფინეთ ან ჩვენ თვითონ გადმოვფენთ. ვხედავდით არჩევნებზე სკოლის მასწავლებლები სიებით საპოლიციო რეჟიმთან და ქუჩის ბიჭებთან ერთად დადიოდნენ, ისინი არიან გაყალბების და სამშობლოს წართმევის პროცესში”,- განაცხადეს შეკრებილებმა.
ბოლო ადგილი, სადაც სტუდენტები შეჩერდნენ გმირთა ხეივანი იყო, სადაც 9 აპრილის მემორიალთან ფიცი დადეს. მათი თქმით, საქართველოს ერთიანობისთვის იბრძოლებენ.
“ბათუმელმა ახალგაზრდებმა ერთხელ ილიას ძეგლთან ფიცი დავდეთ, ახლა 9 აპრილის მემორიალთან ვდებთ. ვფიცავ, რომ დაუღალავად ვიბრძოლებ საქართველოს დამოუკიდებლობისთვის. ვფიცავ, არ დავივიწყებ მათ დაღვრილ წმინდა სისხლს და არ დავუშვებ საქართველოს გარუსებას. აღვასრულებ თაობების ოცნებას, საქართველომ დაიკავოს კუთვნილი ადგილი ევროპულ ოჯახში. ვფიცავ, ვიდგები დემოკრატიის სადარაჯოზე. ვფიცავ არ დავნებდები საბოლოო გამარჯვებამდე”,- თქვეს სტუდენტებმა ფიცის დადებისას.
