“საერთაშორისო გამჭვირვალობა – საქართველოს” მიერ გავრცელებული ინფორმაციით, საპარლამენტო უმრავლესობის წევრის, გიორგი ჭყონიას კომპანია „გზამ“ 2024 წლის 26 ოქტომბრის საპარლამენტო არჩევნების შემდეგ 5 სახელმწიფო ტენდერის შედეგად 37,095,628 ლარი მიიღო.
მიღებული თანხის 91.7% – 34,017,338 ლარი – მოდის ბათუმის მუნიციპალური ა(ა)იპ-ის, “საქალაქო ინფრასტრუქტურისა და კეთილმოწყობის სამმართველოს” მიერ გამოცხადებულ 4 ტენდერზე, ხოლო 3,078,290 ლარი – აჭარის საავტომობილო გზების დეპარტამენტის ტენდერიდან. ორგანიზაციის ინფორმაციით, გიორგი ჭყონიას ბიზნესებს სახელმწიფო შესყიდვებიდან 2011-2025 წლებში ჯამში 392 მილიონ ლარამდე აქვთ მიღებული.
ინფორმაციისთვის: გიორგი ჭყონია 2024 წლის საპარლამენტო არჩევნებში მონაწილეობდა „ქართული ოცნების“ პარტიული სიით და იყო ქობულეთის დელეგატი. ბოლო წლების განმავლობაში მან პარტია „ქართული ოცნება“ 400,000 ლარით დააფინანსა, ხოლო მისი ბიზნესპარტნიორებისა და კომპანიების დირექტორების მიერ გაღებული საერთო შემოწირულობა 1 მილიონ ლარს აჭარბებს.
იუსტიციის სამინისტრომ ფართი „ოცნების” შემწირველი გიორგი ჭყონიას კომპანიისგან იქირავა – TI
