19 აპრილს, ჯონი ბაკურიძის სახელობის ანგისის ბაზაზე, სტარტი აიღო სამოყვარულო ტურნირმა ფეხბურთში – „ქედლების თასი 2025“-მა. ტურნირი, ხულოს მუნიციპალიტეტის სოფელ ქედლებში მცხოვრებ გვარებს შორის ტარდება.
როგორც „ქედლების თასი 2025“-ის ორგანიზატორმა, ონისე ჯოყილაძემ “აჭარა თაიმს” განუცხადა, შეჯიბრებაში რვა-ცხრა გუნდი მონაწილეობს.
„ტურნირში მონაწილეობს რვა-ცხრა გუნდი: ქედელიძეები, ჯოყილაძეები, შავაძეები, შანთაძეები, ბოლქვაძეები, დეკანაძეები, მეხეშიძეები და ჯორბენაძეები,“ – ამბობს ონისე ჯოყილაძე.
შეჯიბრებაში მონაწილე გუნდი ექვსი ფეხბურთელისგან შედგება. მატჩის ხანგრძლივობა 30 წუთია – ორი 15-წუთიანი ტაიმი.
„ტურნირი გრძელდება ორი დღე. თამაშის წესები ასეთია – ვთამაშობთ დაახლოებით რვა გუნდი, რომელიც ექვსი კაცისგან შედგება და ასევე ჰყავთ მოთამაშეები შეცვლაზე,“ – გვითხრა ლაშა ჯიმშერაძემ.
„ქედლების თასი 2025“ წელს მესამედ ტარდება. როგორც შეჯიბრის ორგანიზატორმა გვითხრა, თავდაპირველად ტურნირი ჯანსაღი ცხოვრების წესის პოპულარიზაციის ასამაღლებლად ჩაატარეს, ახლა კი შეჯიბრება სოფლის ყოველწლიურ ტრადიციად იქცა. ორგანიზატორები სამომავლოდ ტურნირის მასშტაბის გაზრდას გეგმავენ და მასში სხვა სოფლების ჩართვა სურთ.
„პირველი ტურნირი მეგობრებმა ჯანსაღი ცხოვრების პოპულარიზაციისთვის ჩავატარეთ. პირველმა ტურნირმა ისეთი გამოხმაურება ჰპოვა ადგილობრივებში, რომ გადავწყვიტეთ, ტრადიციად გვექცია. მომავალში ვგეგმავთ, სხვა სოფლებსაც ვთხოვოთ, შემოგვიერთდნენ ამ კარგ საქმეში და მიიღონ მონაწილეობა. თუ დღეს სტაბილურად მონაწილეობს რვა გუნდი, გვინდა, რომ 15, 16, 20 გუნდამდე ავიდეთ,“ – გვიყვება ონისე ჯოყილაძე.
ავტორი: დიმიტრი გორგილაძე
