ბათუმში, ადლიის ქუჩაზე მცხოვრები მოქალაქეები ინფრასტრუქტურული სამუშაოების გაჭიანურებით შეწუხებულნი არიან და პასუხისმგებელ პირებს დროულ რეაგირებას სთხოვენ. როგორც ადგილობრივები აცხადებენ, მჭიდროდ დასახლებულ უბანში სარეაბილიტაციო სამუშაოები ერთი თვის წინ დაიწყო, თუმცა ამ დროისთვის პროცესი შეჩერებულია და მიზეზი მათთვის უცნობია.
„აქ ვინმე პარლამენტარი რომ ცხოვრობდეს, ორ დღეში გააკეთებდნენ ყველაფერს,“ – ამბობს ერთ-ერთი მცხოვრები, რომელიც გადათხრილ ქუჩაზე გადაადგილების სირთულეზე საუბრობს.
ადგილზე სანიაღვრე არხების ღია მდგომარეობაშია, არ არის დაცული უსაფრთხოების მინიმალური ნორმები, რაც ადგილობრივების თქმით, სერიოზულ რისკს ქმნის ბავშვებისთვის და განსაკუთრებით ღამით გადაადგილებისას.
„სასწრაფო ვერ შემოდის. ოჯახში მყავს მძიმე ავადმყოფი. საკუთარი ხელით ვცდილობ ორმოების გასწორებას. შემთხვევა რომ მოხდეს, მერე იყვირებენ – ბავშვი ჩავარდაო. რისკებს ვხედავთ და ვითხოვთ დროულ რეაგირებას,“ – განუცხადა „აჭარა თაიმსს“ ადგილობრივმა მცხოვრებმა, თამაზ ასამბაძემ.
უბანში არ არის განთავსებული საინფორმაციო აბრა, რომელიც საზოგადოებას პროექტის დეტალებზე მიაწვდიდა ინფორმაციას – როგორიცაა სამუშაოების დამკვეთი, შემსრულებელი კომპანია და სამუშაოების დასრულების ვადები. დამატებითი ინფორმაციის მიღების მიზნით „აჭარა თაიმსმა“ მიმართა ბათუმის მერიას, თუმცა უწყებაში კომენტარი არ გააკეთეს.
