2025 წლის აპრილის განმავლობაში საქართველოდან ჯამში უცხო ქვეყნის 96 მოქალაქე გააძევეს. მიგრაციის დეპარტამენტის ცნობით, გაძევების პროცესი როგორც ნებაყოფლობითი, ისე იძულებითი წესით წარიმართა – ნაწილი უცხო ქვეყნის მოქალაქეებმა საკუთარი სურვილით დატოვეს ქვეყანა, ნაწილს კი ტერიტორია მიგრაციის სამსახურის მიერ ჩატარებული ღონისძიებების შედეგად მოუწია დატოვება.
გაძევებულ მოქალაქეებს მოქმედი კანონმდებლობის შესაბამისად საქართველოში შემოსვლა აკრძალვათ განესაზღვრათ. საქართველოდან გაძევებული პირები სხვადასხვა ქვეყნის მოქალაქეები იყვნენ, მათ შორის ჩინეთის, ბანგლადეშის, ინდოეთის, იორდანიის, რუსეთის, თურქეთის, ირანის, ისრაელის, ტაჯიკეთის, ნიგერიის, ნეპალის, პაკისტანის, თურქმენეთის, ეგვიპტის, კორეის, ფილიპინების, შრი-ლანკას, ლიბანის, საუდის არაბეთის, აზერბაიჯანის, სლოვაკეთისა და ყაზახეთის.
“მიგრაციის დეპარტამენტი აგრძელებს უკანონო მიგრაციის წინააღმდეგ ბრძოლას და ქვეყნის შიგნით იმ უცხო ქვეყნის მოქალაქეთა იდენტიფიცირებას, რომლებიც საქართველოში სამართლებრივი საფუძვლის გარეშე იმყოფებიან. დეპარტამენტის ერთ-ერთი მთავარი ამოცანაა, უზრუნველყოს მიგრაციის პროცესების კონტროლი და ქვეყნის უსაფრთხოების ინტერესების დაცვა,” – წერია უწყების მიერ გავრცელებულ ინფორმაციაში.
