მედიის ადვოკატირების კოალიციამ მკაცრად გააკრიტიკა თავისუფალი მედიის წინააღმდეგ განხორციელებული მოქმედებები და განაცხადა, რომ ხელისუფლების მხრიდან ადგილი აქვს კოორდინირებულ, სისტემურ და პოლიტიკურად მოტივირებულ ზეწოლას. ორგანიზაცია სოლიდარობას უცხადებს ყველა დამოუკიდებელ ჟურნალისტსა და მედიასაშუალებას, რომლებიც მწვავე და რეპრესიულ გარემოში კვლავ აგრძელებენ პროფესიულ საქმიანობას.
კოალიციის განცხადებით, რეგიონებსა და დედაქალაქში ერთდროულად მიმდინარეობს მედიის თავისუფლების შეზღუდვის მცდელობები, რაც გამოხატულებას პოულობს როგორც სამართლებრივ ბერკეტებში, ასევე ფიზიკური და ეკონომიკური ზეწოლის ფორმებში.
კოალიციის შეფასებით, ერთ-ერთ თვალსაჩინო მაგალითად ცხადად მიიჩნევა „ბათუმელებისა“ და „ნეტგაზეთის“ დირექტორის, მზია ამაღლობელის საქმე. ორგანიზაციის განცხადებაში ნათქვამია, რომ ის, ისევე როგორც სხვა სინდისის პატიმრები, უსამართლოდ და პოლიტიკურად მოტივირებულად არიან დაკავებული:
„მზია ამაღლობელი დღეს არის არა მხოლოდ მედიის წარმომადგენელი, არამედ დამოუკიდებელი სიტყვის სიმბოლო. მისი პატიმრობა სრულიად ეწინააღმდეგება დემოკრატიული სახელმწიფოს პრინციპებს“, — აღნიშნულია განცხადებაში.
კოალიციის წევრი ორგანიზაციები მიუთითებენ, რომ პროევროპული საპროტესტო ტალღის დაწყებიდან დღემდე დაფიქსირდა ასობით შემთხვევა, როდესაც ჟურნალისტები ფიზიკური თავდასხმის, მუქარისა და უკანონო ჩარევის მსხვერპლნი გახდნენ. მათი თქმით, ამ დრომდე არცერთი საქმე არ არის სრულფასოვნად გამოძიებული და არც ერთი მოძალადე არ არის პასუხისგებაში მიცემული.
განცხადებაში ყურადღება გამახვილებულია მმართველი გუნდის მიერ მიღებულ რეპრესიულ კანონებზე, რომლითაც მცირდება გამოხატვის თავისუფლება. მათ შორის, განსაკუთრებული ყურადღება ეთმობა უცხოური დაფინანსების შეზღუდვას, რასაც ორგანიზაციები მიიჩნევენ მცდელობად — სრულად გაკონტროლდეს დამოუკიდებელი მედია და ჩამოშორდეს ის ფინანსურ წყაროებს.
ასევე, კოალიცია აღნიშნავს, რომ ბიზნეს-კომპანიებზე მიმდინარეობს მიზანმიმართული ზეწოლა, რათა მათ გაწყვიტონ კონტრაქტები თავისუფალ მედიასთან:
„ეკონომიკური ზეწოლა, რითაც დამოუკიდებელ მედიას ართმევენ სარეკლამო რესურსებს, სცდება ბიზნესეთიკის ყველა სტანდარტს და ემსახურება მხოლოდ თავისუფალი სიტყვის ჩახშობას“, — ნათქვამია განცხადებაში.
მედიის ადვოკატირების კოალიცია აკრიტიკებს საზოგადოებრივი მაუწყებლის სარედაქციო პოლიტიკას და მიუთითებს, რომ მაუწყებელი ემსახურება მმართველი ძალის ინტერესებს. დირექტორი თინათინ ბერძენიშვილი და სამეურვეო საბჭოს თავმჯდომარე ვასილ მაღლაფერიძე — ორგანიზაციის შეფასებით — აქტიურად არიან ჩართულნი კრიტიკული ჟურნალისტების დევნაში.
განსაკუთრებული აღნიშვნის ღირსია მედიაზე წვდომის შეზღუდვა სასამართლო სისტემაში — ჟურნალისტებს კვლავ ეზღუდებათ აუდიტორიაში შესვლის უფლება, რაც არღვევს პროცესების საჯაროობას და ბლოკავს საზოგადოების უფლებას მიიღოს ინფორმაცია.
