ადამიანის უფლებათა ევროპულმა სასამართლომ ჟურნალისტისა და „ბათუმელების“ ერთ-ერთი დამფუძნებლის, მზია ამაღლობელის საქმეზე განხილვა ოფიციალურად დაიწყო. ინფორმაცია ამის შესახებ დღეს, 26 ივნისს, გამართულ პრესკონფერენციაზე საზოგადოებას საქართველოს ახალგაზრდა იურისტთა ასოციაციის (საია) თავმჯდომარემ, ნონა ქურდოვანიძემ გააცნო.
მისი თქმით, სტრასბურგის სასამართლომ რამდენიმე დღის წინ აცნობა საია-ს, რომ საქმე ოფიციალურად მიღებულია განსახილველად და მას შესაძლოა მნიშვნელოვანი ზეგავლენის სტატუსი მიენიჭოს – რაც მიუთითებს მისი არსებითი მნიშვნელობისა და პრეცედენტული ხასიათის შესაძლებლობაზე.
„სასამართლომ დაიწყო საქმეზე არსებითი განხილვა, რაც ნიშნავს, რომ კონკრეტულ უფლებადარღვევებთან დაკავშირებით უკვე მიმდინარეობს კომუნიკაცია საქართველოსთან. ხაზგასმით გვინდა აღვნიშნოთ, რომ სტრასბურგმა ეს პროცესი უმოკლეს ვადაში დაიწყო – მხოლოდ ორი თვეა გასული მას შემდეგ, რაც საჩივარი წარვადგინეთ“, – განაცხადა ნონა ქურდოვანიძემ.
საია-ს მიერ წარდგენილ საჩივარში მითითებულია, რომ საქართველოს სახელმწიფომ მზია ამაღლობელის მიმართ დაარღვია ადამიანის უფლებათა ევროპული კონვენციით დაცული რამდენიმე ფუნდამენტური უფლება, მათ შორის:
- თავისუფლებისა და პირადი უსაფრთხოების უფლება (მუხლი 5)
- სამართლიანი სასამართლოს უფლება (მუხლი 6)
- გამოხატვის თავისუფლება (მუხლი 10)
„მნიშვნელოვანია, რომ საქართველოს სახელმწიფოს უკვე გადაეცა სასამართლოს შეკითხვები, რომელთაც იგი განსაზღვრულ ვადებში უნდა უპასუხოს. ეს არის იმთავითვე სერიოზული და საყურადღებო ეტაპი საქმეში,“ – აღნიშნა ქურდოვანიძემ.
მისი განცხადებით, მზია ამაღლობელი ამ ეტაპზე კვლავ უკანონო პატიმრობაში იმყოფება, რაც თავადაც წარმოადგენს ერთ-ერთ მთავარ გარემოებას, რაზეც სტრასბურგის სასამართლოს ყურადღება გამახვილდა.
საია-ის თავმჯდომარემ საზოგადოებას კიდევ ერთხელ დაუდასტურა, რომ დაცვა ყველა სამართლებრივ მექანიზმს გამოიყენებს ეროვნული დონიდან დაწყებული საერთაშორისო ინსტანციებამდე, რათა უზრუნველყოფილი იყოს ამაღლობელის უფლებების დაცვა.
