მას შემდეგ, რაც პარლამენტში რუსული კანონის ინიცირება და განხილვა დაიწყო აჭარაში მოქმედმა არასამთავრობო ორგანიზაციებმა უმაღლესს საბჭოსთან თანამშრომლობა შეწყვიტეს. რეგიონის წარმომადგენლობით ორგანოს რეკომენდაციების შემუშავებასა და სერვისების მიწოდებაში არასამთავრობო ორგანიზაციები აღარ ეხმარებიან.
“აჭარა თაიმსმა” უმაღლესი საბჭოს თავმჯდომარეს მესამე სექტორის გადაწყვეტილების შეფასება სთხოვა, რაზეც დავით გაბაიძემ განაცხადა, რომ ფაქტს არ მიესალმება. რეპრესიული მექანიზმების ფონზე რუსული კანონის მხარდამჭერი დავით გაბაიძე ფიქრობს, რომ მესამე სექტორსა და მედია ორგანიზაციებს საფრთხე არ ემუქრებათ.
“ეს ჩემთვის არ არის მისასალმებელი ფაქტი, გამომდინარე იქედან, რომ მე პირადად ყოველთვის ღია ვიყავი არასამთავრობო ორგანიზაციებთან. არსებობდა ღია მმართველობის საბჭოსთან საკონსულტაციო ჯგუფი. თუმცა გასაგები მოსაზრებების გამო, ისე რომ მათ უმაღლესს საბჭოსთან არ ჰქონიათ პრეტენზია მაინც გააჩერეს თანამშრომლობა. ჩვენ მათ გადაწყვეტილებას პატივს ვცემთ. უმაღლესს საბჭოს არ მიუცია იმის საფუძველი მესამე სექტორისთვის, რომ ეს თანამშრომლობა არ გაგრძელებულიყო. ჩვენ ვაგრძელებთ საქმიანობას იმ ძალებით და იმ საშუალებებით რაც გაგვაჩნია,” – აცხადებს დავით გაბაიძე.
უმაღლესი საბჭოს თავჯდომარეს რუსულ კანონსა და რეპრესიულ მექანიზმებზეც ვკითხეთ, რამაც შესაძლოა მესამე სექტორის, ასევე, მედია ორგანიზაციების ჩამოშლა გამოიწვიოს. კითხვაზე დავით გაბაიძეს მარტივი პასუხი ჰქონდა: Dura lex, sed lex.
“მე არ ვიცი ვის რა მოლოდინი ჰქონდა. კანონი არსებობს და როგორ იმუშავებს ეს გამოჩნდება სამომავლოდ. ვინც არ რეგისტრირდება ესეც მათი ნებაა, კანონს გააჩნია აღსრულების მექანიზმი, მეტი რა გითხრათ? იუსტიციის სამინისტროსა და იმ სუბიექტების გადასაწყვეტია რა ფორმით გაგრძელდება ამიერიდან პროცესები. მე ასე ტრაგიკულად არ ვხედავ მოვლენების განვითარებას. არამგონია მესამე სექტორი ჩამოიშალოს. კანონი მკაცრია, მაგრამ მაინც კანონია. Dura lex, sed lex – ასე ამბობდნენ რომაელები,” – აღნიშნა “აჭარა თაიმსთან” საუბრისას დავით გაბაიძემ.
ინფორმაციისთვის: რუსული კანონი უკვე ამოქმედდა, მათ შორის რეპრესიული მექანიზმებიც ძალაშია. იუსტიციის სამინისტროს ცნობით, აგენტების სიაშია ორგანიზაციათა 2 პროცენტამდეა დარეგისტრირებული.
საჯარო რეესტრის ეროვნული სააგენტოს ინფორმაციით, საქართველოში რეგისტრირებულია 31 233 არასამეწარმეო იურიდიული პირი.
