ფინანსთა სამინისტროს საგამოძიებო სამსახურმა აჭარისა და გურიის რეგიონებში უკანონოდ მოქმედი ვალუტის გადამცვლელი 22 პუნქტი გამოავლინა. უწყების ინფორმაციით, აღნიშნული ობიექტები ეროვნული ბანკის შესაბამისი ნებართვის გარეშე საქმიანობდნენ და მოწყობილი იყო კანონმდებლობით განსაზღვრული მოთხოვნების დარღვევით.
გამოძიების ფარგლებში, სასამართლოს განჩინების საფუძველზე, ერთდროულად ჩატარდა ჩხრეკა 22 ლოკაციაზე. საგამოძიებო მოქმედებების შედეგად ამოღებულია დიდი ოდენობით ქართული და უცხოური ვალუტა, კომპიუტერული ტექნიკა და ვალუტის კონვერტაციისთვის საჭირო ინვენტარი.
ამოღებული ვალუტის საერთო ღირებულება 500 ათას ლარს აღემატება. ფინანსთა სამინისტროს საგამოძიებო სამსახურის ცნობით, მიმდინარეობს საგამოძიებო მოქმედებები დანაშაულში მონაწილე პირების გამოვლენის მიზნით.
გამოძიება საქართველოს სისხლის სამართლის კოდექსის 192-ე მუხლის მეორე ნაწილის „ა“ ქვეპუნქტით მიმდინარეობს, რაც 3-დან 5 წლამდე თავისუფლების აღკვეთას ითვალისწინებს.
