შინაგან საქმეთა სამინისტროს ინფორმაციით, კომპლექსურად ჩატარებული საგამოძიებო მოქმედებების შედეგად, ჯგუფურად ჩადენილი გამოძალვის ბრალდებით უცხო ქვეყნის ორი მოქალაქე დააკავეს.
უწყების ცნობით, გამოძიებით დადგინდა, რომ ბრალდებულები უცხო ქვეყნის მოქალაქეს გამოგონილი სახელებით გაეცნენ და საქართველოში დასაქმებასა და ბინადრობისთვის საჭირო დოკუმენტების მოწესრიგებას დაჰპირდნენ. სანაცვლოდ კი წინასწარ 3 000 ევროს ჩამოტანა მოსთხოვეს.
სამინისტროს ინფორმაციით, აჭარაში ჩამოსვლის შემდეგ, ბრალდებულებმა კაცს 3 000 ევრო, პირადობის მოწმობა და SIM-ბარათი წაართვეს. თანხისა და ნივთების დაბრუნების მოთხოვნის მიუხედავად, მათ აღნიშნული არ დაუბრუნებიათ და მომხდარის გახმაურების შემთხვევაში სიცოცხლის მოსპობით დაემუქრნენ. ორივე პირი ცხელ კვალზე ჩატარებული ოპერატიული ღონისძიებებისა და საგამოძიებო მოქმედებების შედეგად დააკავეს.
გამოძიება ჯგუფურად ჩადენილი გამოძალვის ფაქტზე, საქართველოს სისხლის სამართლის კოდექსის 181-ე მუხლის მე-2 ნაწილით მიმდინარეობს, რაც 7 წლამდე თავისუფლების აღკვეთას ითვალისწინებს.
