შინაგან საქმეთა სამინისტროს ცნობით, საგამოძიებო მოქმედებების შედეგად, განსაკუთრებით დიდი ოდენობით ნარკოტიკული საშუალებების უკანონო შეძენა-შენახვისა და რეალიზაციის ბრალდებით, სამი პირი დააკავეს.
დაკავებულთა შორისაა 1973 წელს დაბადებული ნ.ქ. და უცხო ქვეყნის მოქალაქეები – 1993 წელს დაბადებული მ.ი. და 2004 წელს დაბადებული ქ.მ.
შსს განმარტავს, რომ ბრალდებულების დროებით საცხოვრებელ სახლებში და სხვადასხვა ადგილას ჩხრეკისას ნივთმტკიცებად ამოიღეს განსაკუთრებით დიდი ოდენობით ნარკოტიკული საშუალებები: „ჰეროინი“, „მორფინი“, გამომშრალი „მარიხუანა“, ასევე, ნარკოტიკების დაფასოებისა და კულტივირებისთვის საჭირო მასალები. ერთ-ერთი ბრალდებულის მიერ უკანონოდ გაყიდული ნარკოტიკული საშუალებაც ნივთმტკიცებადაა ამოღებული.
დანაშაული 20 წლამდე ან უვადო თავისუფლების აღკვეთას ითვალისწინებს. გამოძიება სისხლის სამართლის კოდექსის 260-ე, 260-ე კვარტა და 260-ე ტერცია მუხლებით მიმდინარეობს.
