შინაგან საქმეთა სამინისტროს ინფორმაციით, აჭარაში დიდი ოდენობით თანხისა და ქონებრივი უფლების მოტყუებით დაუფლების ფაქტზე, მოსამართლის განჩინების საფუძველზე, ერთი პირი დააკავეს.
უწყების ცნობით, გამოძიებით დადგინდა, რომ ბრალდებულმა დაზარალებული დაარწმუნა, თითქოს მას 5 მილიონი აშშ დოლარის ოდენობის გრანტის მიღებაში დაეხმარებოდა. სანაცვლოდ კი დაზარალებულს მისთვის 100 000 აშშ დოლარი უნდა გადაეხადა, ასევე ეღიარებინა არარსებული ვალი, 50 000 აშშ დოლარის ოდენობით.
გამოძიება საქართველოს სისხლის სამართლის კოდექსის 180-ე მუხლის მე-3 ნაწილის „ბ“ ქვეპუნქტით მიმდინარეობს, რაც დიდი ოდენობით თაღლითობას გულისხმობს და სასჯელის სახით 9 წლამდე ვადით თავისუფლების აღკვეთას ითვალისწინებს.
