უსკოს შემაჯამებელი ოქმის საფუძველზე, აჭარის ერთპარტიული უმაღლესი საბჭო დღეს პირველად შეიკრიბა. სხდომა უსკოს თავმჯდომარემ გახსნა.
პარმენ ჯალაღონიას თქმით, 26 ოქტომბრის არჩევნებში მონაწილე 11 საარჩევნო სუბიექტიდან, კანონმდებლობით დადგენილი 5%-იანი ბარიერი მხოლოდ 5-მა პარტიამ გადალახა. მათგან ყველაზე მეტი – 13 მანდატი „ქართულმა ოცნებამ“ მიიღო, 4 მანდატი აქვს – „ნაციონალურ მოძრაობას“, 2 – „გახარია საქართველოსთვის“, 1-1 კი “კოალიცია ცვლილებისთვის’’ და ,,ლელო საქართველოსთვის”.
დღევანდელ სხდომას მხოლოდ მმართველი გუნდის წევრები ესწრებოდნენ. გაყალბებული არჩევნების მიზეზით, უმაღლეს საბჭოში შესვლაზე ოპოზიციონერები უარს აცხადებენ და სიის ჩახსნას აპირებენ.
არაკონსტიტუციურად შეკრებილებმა თავმჯდომარედ ისევ დავით გაბაიძე აირჩიეს. დღესვე აირჩიეს თავმჯდომარის მოადგილე, კომიტეტების ხელმძღვანელები და ფრაქციის თავმჯდომარე.
- აგრარულ და გარემოს დაცვის საკითხთა კომიტეტი: ფრიდონ ფუტკარაძე,
- ადამიანის უფლებათა დაცვის საკითხთა კომიტეტი: ცოტნე ანანიძე,
- განათლების, მეცნიერების, კულტურისა და სპორტის საკითხთა კომიტეტი: დავით ბაციკაძე,
- საკონსტიტუციო, იურიდიულ და საპროცედურო საკითხთა კომიტეტი: ტიტე აროშიძე,
- საფინანსო-საბიუჯეტო და ეკონომიკურ საკითხთა კომიტეტი: მარინე გვიანიძე,
- ჯანმრთელობის დაცვისა და სოციალურ საკითხთა კომიტეტი: ვახტანგ ბერიძე.
სხდომის პარალელურად, საკანონმდებლო ორგანოს შენობასთან საპროტესტო აქცია გაიმართა.
