ბათუმის საქალაქო სასამართლოში მკვლელობის საქმეზე გამოტანილი განაჩენი პროტესტის მიზეზი გახდა. საქმე 2025 წლის მაისში მომხდარ ფაქტს ეხება – შემთხვევა აღმაშენებლის ქუჩაზე მოხდა, სადაც კაცი ჩასაფრებით მოკლეს.
მოსამართლემ მკვლელობაში ბრალდებულს 13 წლით თავისუფლების აღკვეთა მიუსაჯა, რაც დაზარალებული ოჯახისთვის მიუღებელი აღმოჩნდა. მოკლულის ოჯახის წევრების განცხადებით, ჩადენილი დანაშაულის სიმძიმის გათვალისწინებით, მსჯავრდებულს უფრო მკაცრი სასჯელი უნდა დაეკისრებინა.
დაზარალებული ოჯახის ინფორმაციით, ბრალდებულმა 47 წლის კაცი იარაღიდან გასროლით მოკლა. მათი თქმით, კონფლიქტის საფუძველი მსჯავრდებულის უარყოფითი დამოკიდებულება იყო მოკლულის შვილისა და მისი შეყვარებულის ნათესავს შორის არსებულ ურთიერთობაზე.
მოკლული გურამ ბერიძის ოჯახის წევრები და ახლობლები აცხადებენ, რომ სასამართლოს გადაწყვეტილებას კანონით დადგენილ ვადებში ზემდგომ ინსტანციაში გაასაჩივრებენ.
