1 იანვრიდან 30 ივნისის ჩათვლით, უკანონო თევზჭერის 332 ფაქტი გამოავლინეს. მათგან 140 ფაქტი სისხლის სამართლის დანაშაულის ნიშნებს შეიცავს. მასალები, შემდგომი რეაგირების მიზნით, შესაბამის უწყებებში გადაიგზავნა, ამის შესახებ გარემოსდაცვითი ზედამხედველობის დეპარტამენტი იტყობინება.
უწყებიც ცნობით, ბრაკონიერები, უმეტეს შემთხვევაში, იყენებდნენ ისეთ უკანონო თევზსაჭერ საშუალებებს, როგორიცაა სახლართი ბადე, ელექტროშოკური მოწყობილობა, ჩოგან-ბადე და სხვა. ჯამში, უკანონოდ მოპოვებული თევზის ოდენობამ 243 კგ-ს გადააჭარბა.
“6 თვეში პრევენციული ღონისძიებების შედეგად, ჯამში ამოღებულია 2400 მეტრზე მეტი სიგრძის სახლართი ტიპის ბადე, 200 მეტრზე მეტი სიგრძის თოკზე მობმული ნემსკავი და 31-ზე მეტი ერთეული თევზმახე – ე.წ. ოჩხი.
ბადეები ამოღებულია: აჭარისა და გურიის რეგიონული სამმართველოს თანამშრომლების მიერ მდინარეების – ჭოროხის, კაპარჭინას, სუფსისა და აჭარისწყალის კალაპოტიდან, ასევე – ლაშთანის ტბიდან; მცხეთა მთიანეთის რეგიონული სამმართველოს თანამშრომლების მიერ მდინარე მტკვრიდან, ასევე, ჟინვალისა და სიონის წყალსაცავებიდან; ცენტრალური ოფისის თანამშრომლების მიერ კი, თბილისის ზღვიდან,” – აცხადებენ გარემოსდაცვითი ზედამხედველობის დეპარტამენტში.
ინფორმაციისთვის: კანონდართვევების შესახებ ინფორმაციის მიწოდება შეგიძლიათ გარემოს დაცვისა და სოფლის მეურნეობის სამინისტროს ცხელ ხაზზე, რომლის ნომერია: 153
