კაფე, რომელიც უნებართვოდ აშენდა და საქმიანობს
ქობულეთში, თამარ მეფის ქუჩაზე არსებული უნებართვო ობიექტი ფუნქციონირებას განაგრძობს. კანონდარღვევის ფაქტზე მუნიციპალიტეტის ზედამხედველობის სამსახური არ რეაგირებს. ობიექტი დაჯარიმებისა და გაფრთხილების მიუხედავად, კვლავ ფუნქციონირებს.
აღნიშნულ უკანონობაზე “აჭარა თაიმსი” გასულ წელს წერდა, თუმცა ერთი წლის შემდეგაც ადგილზე მდგომარეობა უცვლელია. მაშინ მერიაში გვითხრეს, რომ მეპატრონე დააჯარიმეს და ობიექტის დაუყონლებლივ დემონტაჟის ბრძანება გასცეს.
“მეპატრონემ მერიის გადაწყვეტილებას სასამართლოში გაასაჩივრა, რამაც პროცესი შეაჩერა,” – გვითხრეს ქობულეთის მერიაში.
კიდევ ერთი უკანონო მშენებლობაა მომიჯნავედ, ამ შემთხვევაშიც მერიამ უკანონობა დღემდე ვერ აღკვეთა. აღსანიშნავია ის გარემოება, რომ კაფის მშენებლობა ზღვაზე ჩასასვლელ კიბეზე მიმდინარეობს.
უკანონო მშენებლობები და ქობულეთიის მერიის უმოქმედობა დააფიქსირა სახელმწიფო აუდიტის სამსახურმაც, რომელიც თავის დასკვნაში მერიას აკრიტიკებს. კერძოდ, დასკვნის თანახმად, მუნიციპალიტეტის მერიის მიერ გაცემული სამშენებლო ნებართვები დანაშაულის ნიშნებს შეიცავს, ასევე, უკანონო მშენებლობებზე სათანადო რეაგირება არ ხდება.
“თამარ მეფის სანაპირო №52-ისა და №54-ის მიმდებარედ, დაფიქსირდა კაფე ბარების უნებართვო მშენებლობები. ორივე შემთხვევაში მშენებლობა განხორციელებულია მუნიციპალიტეტის საკუთრებაში არსებულ მიწის ნაკვეთზე, რომლითაც აღნიშნული პირები სარგებლობდნენ მერიასთან გაფორმებული საიჯარო ხელშერკულების საფუძველზე.
აღნიშნულთან დაკავშირებით 2023 წლის ივლისში მუნიციპალიტეტის ზედამხედველობის სამსახურის მიერ მიღებულია დადგენილებები, მშენებელი პირების დაჯარიმებისა და უკანონოდ აშენებული შენობების დემონტაჟის შესახებ, თუმცა აუდიტორების შესწავლის პროცეში აღმოჩნდა, რომ შენობების დემონტაჟი არ იყო განხორციელებული.
მერიის მიერ უკანონო მშენებლობების აღკვეთის მიზნით გატარებულმა ღონისძიებებმა ვერ უზრუნველყო უნებართვო მშენებლობების შეჩერება და სახელმწიფო საკუთრებაში არსებული მიწის ნაკვეთების უკანონო გამოყენება, რაც ქობულეთის ტერიტორიაზე მშენებლობების ზედამხედველობასთან დაკავშირებული შიდა კონტროლის სისტემის არსებით სისუსტეზე მიუთითებს,” – წერენ აუდიტორები დასკვნაში.
კიდევ ერთი უკანონო მშენებლობა რაზეც “აჭარა თაიმსი” რამდენიმე დღის წინ წერდა ქობულეთის ცენტრალურ პარკში მიმდინარეობს. ვიცე მერის კლასელისა და კურსელის ოჯახის უნებართვო მშენებლობის შესახებ უფრო მეტს წაიკითხავთ ბმულზე.
