ხულოს მუნიციპალიტეტში, მწვანე ტბის მიმდებარედ ინერტული მასალის მოპოვება დანაშაულის ნიშნებს შეიცავს, ამის შესახებ “ნაციონალური მოძრაობის” წევრმა ბრიფინგზე განაცხადა. გია აბულაძის თქმით, ნადგურდება ტბის ეკოსისტემა, რამაც შესაძლოა ტბის დაშრობა და ეროზიგამოული პროცესები გამოიწვიოს.
გია აბულაძე პროკურატურასა და სახელმწიფო აუდიტის სამსახურს მიმართავს. უმაღლესი საბჭოს წევრი გამოძიების დაწყებას ითხოვს.
“მწვანე ტბა მაღალმთიანი აჭარის უმნიშვნელოვანესი ტურისტული ადგილია, გამორჩეული ეკოსისტემითა და ბუნებით. ტბა ივსება ჩამდინარე წყაროებით. მწვანე ტბის მიმდებარედ დაიწყეს ინერტული მასალის უკანონო მოპოვება.
მოვუწოდებ: პროკურატურასა და აუდიტის სამსახურს დაუყოვნებლივ დაიწყოს გამოძიება და შესწავლა, რატომ მოხდა ინერტული მასალის მოპოვება, ასევე, გარემოს ეროვნულმა სამსახურმა: ა) დაუყოვნებლივ მოახდინოს რეაგირება და შეწყდეს მწვანე ტბის განადგურება; ბ) შეისწავლოს გარემოზე მიყენებული ზიანის ოდენობა და მოთხოვნილი იქნას შესაბამის კომპანიაზე ზიანი; გ) დაუყოვნებლივ დაიწყოს აღდგენითი სამუშაოები,” – განაცხადა ბრინფინგზე გია აბულაძემ.
ინფორმაციისთვის: მწვანე ტბის მიმდებარედ ინერტული მასალის მოპოვების ფაქტზე “აჭარა თაიმსი” რამდენიმე დღის წინ წერდა. ადგილობრივები შიშობენ, რომ პროცესი გარემოსთვის, მათ შორის ტბისთვის ზიანის მომტანი იქნება. ტერიტორია, სადაც ქვიშას მოიპოვებენ გეოლოგიურად არამდგრადია.
საზოგადოებისთვის ამ დრომდე უცნობია ვინ მოიპოვებს ინერტულ მასალას, ან არის თუ არა ნებართვა გაცემული. სახელმწიფო უწყებებს შესაბამისი ინფორმაცია არ გამოუქვეყნებიათ.
