ბათუმში, ფიროსმანის ქუჩის პირველ ნომერში დაგეგმილ მშენებლობას მეზობლები ეწინააღმდეგებიან. მათი თქმით, ცათამბჯენი ხედს დაფარავს, ასევე, ეზოში პარკირების პრობლემა შეიქმნება.
ფიროსმანის პირველ ა-ში მცხოვრებლები ამბობენ, რომ მათი ინვესტორისგან მომიჯნავედ არსებულ ეზოში, სადაც ძველი ორსართულიანია მის ნაცვლად, გამწვანებისა და სკვერის მოწყობის დაპირება მიიღეს, თუმცა მოტყუებულები დარჩნენ.
“ეზო ისეთი პატარა გვაქვს, მანქანის გაჩერებაც გვიჭირს. ბავშვებს თამაშიც კი უჭირთ. ამხელა სახლთან კიდევ ერთი კორპუსის მშენებლობა არ გვინდა, ვეწინააღმდეგებით. სკვერი გააკეთდეს, რომ ბავშვებმა გართობა შეძლონ,” – აღნიშნა ჩვენთან საუბრისას მარინე დოლიძემ.
ორსართულიანი სახლი, რომლის დემონტაჟსა და ახლის მშენებლობას ეწინაღმდეგებიან ავარიულია. საბჭოთა დროინდელ კორპუსში მცხოვრებლების თქმით, შენობა გამაგრებას არ ექვემდებარება, რისი დამადასტურებელი დოკუმენტიც გააჩნიათ. მათი თქმით, შენობის კედლები დაბზარულია და ცხოვრება რისკის ფასად უწევთ.
აქ მცხოვრებლები იმასაც ამბობენ, რომ როცა მომიჯნავედ მრავალსართულიანი შენდებოდა მათ წინააღმდეგობა არ ჰქონიათ, რადგან მეზობლების არსებული ყოფის გაუმჯობესება ახარებდათ. ისინი იმასაც ამბობენ, რომ სხვა ტერიტორიაზე ცხოვრების გაგრძელება არ სურთ, ამიტომაც მოიძიეს ინვესტორი.
“როდესაც ჩვენს მეზობლად კორპუსი შენდებოდა ჩვენ გავჩუმდით, ხელი არ შეგვიშლია. მე მესმის მათი, რომ ხედი აღარ ექნებათ, მაგრამ ჩვენ რა დავაშავეთ? სკვერი და კაი ცხოვრება ჩვენც გვინდა, მაგრამ შემქნილი ვითარების ფონზე ამის ფუფუნება აღარაა. ჩვენ ვითხოვთ ელემენტარულს, ჩვენს ტერიტორიაზე ახალი კორპუსის მშენებლობას. ეს ძალიან ძველი სახლია, რეაბილიტაციას აღარ ექვემდებარება. ინვესტორი ვერ იწყებს მშენებლობას წინააღმდეგობის გამო,” – ამობობს ზვიად მაკარაძე.
