„ოცნების მიერ, აჭარაში წარმოდგენილი დელეგატები, ანზორ ბოლქვაძე და გია ჭყონია ნეპოტიზმითა და უკონკურენტოდ ტენდერების მოგებით გამდიდრდნენ,” – ამის შესახებ ბრიფინგზე “ნაციონალური მოძრაობის” წევრებმა განაცხადეს.
ბონდო თედორაძისა და რეზო ხარაზის შეფასებით, ბიზნესმენები გამარჯვების შემდეგ საკუთარ კეთილდღეობაზე იზრუნებენ და მათ ხალხი ისევ არ გაახსენდებათ.
“ყველას კარგად მოგეხსენებათ, რომ მაჟორიტარული სისტემა მივაბარეთ წარსულს, თუმცა, “ოცნება” მაინც ებღაუჭება მას და ამჯერად ივანიშვილმა თავისი ,,დელეცები“ წარმოგვიდგინა ე.წ დელეგატების სახით. მინდა, კარგად იცოდეს საზოგადოებამ, ვინ არიან ეს ადამიანები, როგორ მოახერხეს ივანიშვილის ,,დელეცად“ წოდებულმა ანზორ ბოლქვაძემ და გია ჭყონიამ გამდიდრება იმ ფონზე, როცა აჭარაში ოფიციალური სტატისტიკით 147 000 ადამიანი სიღარიბეს ებრძვის, აქედან 25 000 ბავშვი სოციალურად დაუცველია და სახელმწიფო შემწეობაზეა. როგორ მოახერხეს აჭარის სანაპიროზე საუკეთესო ადგილების მიწების მისაკუთრება, როგორ მოახერხეს ყველა მსხვილი ტენდერის უკონკურენტოდ მოგება. მაგალითად, დეპუტატი ანზორ ბოლქვაძე ფლობს წილებს სხვადასხვა კომპანიაში, ნეპოტიზმი არის მისი მთავარი ხაზი და რაც მნიშვნელოვანია, ის აკონტროლებს მაღალმთიანი აჭარის ყველა მუნიციპალიტეტის ბიუჯეტს თავისი საცეცებით,” – განაცხადა რეზო ხარაზმა ბრიფინგზე.
“ივანიშვილი, ნაცვლად სიღარიბის დაძლევისა, ნაცვლად სიახლისა – გვაბრუნებს წარსულში, სადაც კორუფციით, ნეპოტიზმით, ტენდერების ჩაწყობით, ახლა უკვე თავისი ე.წ დელე(ც)გატი გია ჭყონია შესთავაზა აჭარას და კონკრეტულად, ქობულეთს. ჩვენმა ხალხმა უნდა იცოდეს, რომ 2024 წლის 26 ოქტომბერს ერთ მხარეს არის მილიონერი გია ჭყონია თავისი ჩაწყობილი ტენდერებით, მწვანე კონცხზე და არა მარტო იქ, გროშებად მიტაცებული სახელმწიფო მიწებით, ოცნებაზე შეწირული მილიონობით ლარით, სახელმწიფო აუდიტის არაერთი დასკვნა, სადაც არაჯეროვნად ხშირ შემთხვევებში კორუფციული გზით ხდებოდა მოგებული ტენდერების განხორციელება; ხოლო, მეორე მხარეს არის ევროპული, ცივილიზებული, წარმატებული სახელმწიფოს იდეა, სადაც ხელისუფალი ზრუნავს ახალზე და ასრულებს ხალხის დაკვეთას, წარმატებულ ბიზნესს კი აქვს თავისი ადგილი,” – განაცხადა ბონდო თედორაძემ.
ინფორმაციისთვის: პრემიერ მინისტრმა, ირაკლი კობახიძემ “ქართული ოცნების” დელაგატები წარადგინა, მათ შორის აჭარიდანაც. ბიზნესმენი გია ჭყონია, მომღერალი არჩილ ბერიძე და დეპუტატი ანზორ ბოლქვაძე – ეს სამი კანდიდატი ეყოლება მმართველ პარტიას წარმოდგენილი არჩევნებზე.
აქვე დაგაინტერესებთ:
- “ოცნების” დელეგატები აჭარიდან – რა ვიცით კანდიდატებზე
- იუსტიციის სამინისტრომ ფართი „ოცნების” შემწირველი გიორგი ჭყონიას კომპანიისგან იქირავა – TI
