პრემიერ მინისტრმა, ირაკლი კობახიძემ ბრიფინგზე “ქართული ოცნების” დელაგატები წარადგინა, მათ შორის აჭარიდანაც. ბიზნესმენი გია ჭყონია, მომღერალი არჩილ ბერიძე და დეპუტატი ანზორ ბოლქვაძე – ეს სამი კანდიდატი ეყოლება მმართველ პარტიას წარმოდგენილი არჩევნებზე.
„ბათუმში იქნება არჩილ ბერიძე, რომელსაც თქვენ იცნობთ ჯგუფ „ალილოდან“. ქობულეთში წარმატებული ბიზნესმენი, გია ჭყონია. ხელვაჩაური, ქედა, ხულო, შუახევი კი, ანზორ ბოლქვაძე, მოქმედი დეპუტატი. ყველა დელეგატი „ქართული ოცნების“ პროპორციულ სიაში იქნება წარმოდგენილი გამსვლელ ადგილზე. შესაბამისად, ჩვენ უზრუნველვყოფთ იმას, რომ მომდევნო მოწვევის პარლამენტში უკლებლივ ყველა ქალაქს და რეგიონს ეყოლება თავისი წარმომადგენელი და ამით ნაწილობრივ იქნება აღმოფხვრილი ის ნაკლოვანება, რომელიც არის დაკავშირებული მაჟორიტარული სისტემის გაუქმებასთან,” – განაცხადა ირაკლი კობახიძემ კანდიდატების წარდგენისას.
- ანზორ ბოლქვაძე ოთხი მოწვევის პარლამენტის წევრია, ის პირველად საკანონდებლო ორგანოში “ნაციონალური მოძრაობის” სახელით შევიდა, ხელისუფლების შეცვლის შემდეგ კი, ბოლქვაძე “ქართულ ოცნებას” შეუერთდა. აღსანიშნავია ის ფაქტი, რომ ანზორ ბოლქვაძე რუსული კანონის მხარდამჭერი დეპუტატია. მესამე სექტორის კვლევის შედეგად, ბოლქვაძე კორუფციულ სქემებშიც ფიგურირებს. ცნობისთვის, აჭარის მაღალმთიანეთის მაჟორიტარის, ნათესავების კომპანიებმა 2016-2023 წლებში სახელმწიფო შესყიდვებიდან ჯამში 16 520 805 ₾არი მიიღეს.
- „საერთაშორისო გამჭვირვალობა საქართველოს” ცნობით, გიორგი ჭყონიამ, რომელიც ხელისუფლებასთან დაახლოებული ბიზნესმენია, 2011-2023 წლებში სახელმწიფო შესყიდვებიდან 335,638,719 ₾არი მიიღო. ჭყონია „ქართულ ოცნებასთან“ დაახლოებული პირია. ამის დასტური პარტიებისთვის შეწირული თანხის სტატისტიკაა, სადაც წერია, რომ მან და მისმა ბიზნესპარტნიორებმა მმართველ პარტიასა და საპრეზიდენტო კანდიდატს, სალომე ზურაბიშვილს ჯამში, 1,394,000 ₾არი შესწირეს.
- არჩილ ბერიძე პოლიტიკაში ახალი სახეა, თუმცა ის “ქართულ ოცნებასთან” აფილირებული მომღერალია. მისი ღონისძიებების ორგანიზატორი და დამფინანსებელი ძირითადად საჯარო უწყებებია.
ინფორმაციისთვის: დელეგატები არიან პარტიის პროპორციულ საარჩევნო სიაში წარმოდგენილი კანდიდატები, რომლებიც კონკრეტულ საარჩევნო ოლქებში კამპანიის წარმოებაზე და უკვე არჩევნების შემდეგ, საქართველოს პარლამენტში შესაბამისი ამომრჩევლის ინტერესების დაცვაზე იქნებიან პასუხისმგებელი.
აქვე დაგაინტერესებთ ⇓
- აჭარაში სხვა რეგიონებიდან ამომრჩეველთა გადმოწერა მიმდინარეობს – ნინო ჩხეტია
- პოლიტიკური კამპანია და საინფორმაციო მანიპულაციები ტიკტოკზე
