ბუნებრივი აირის დაზიანებული მილი - ქობულეთი, სოფელი ჩეხედანა
რატომაა ქობულეთის სოფლები დღემდე ბუნებრივი აირის გარეშე – კითხვით აჭარის მთავრობას ქობულეთის საკრებულოს დეპუტატი მიმართავს. “ნაციონალური მოძრაობის” წევრს აინტერესებს რა ბედი ეწია 20 მილიონიან პროექტს, რომელსაც სოფლების გაზიფიცირება უნდა უზრუნველეყო. ლაშა კომახიძის ინფორმაციით, სოფლებში გაყვანილი ბუნებრივი აირის მილები უკვე დაზიანებულია და ის ხელახალ დაქსელვას საჭიროებს.
ლაშა კომახიძემ დღეს ბრიფინგი გამართა და ხელისუფლებას მედიის საშუალებით კითხვებით მიმართა, რადგან პასუხებს საკრებულოს სხდომებზე ვერ იღებს.
“რუსი ოლიგარქი ივანიშვილი ხელისუფლებაში მოსვლამდე ქართველ ხალხს ჰპირდებოდა თითო სოფელზე 5 მლნ. ლარს, მაგრამ დღეის მდგომარეობით ქობულეთის სოფლებში კვლავ დგას საყოფაცხოვრებო საჭიროებები. როგორიცაა: გზის, გაზისა და სასმელი წყლის პრობლემები. 2013 წლიდან დღემდე “ქართულმა ოცნებამ” ქობულეთში გაზიფიცირების საკითხზე 20 მლნ.-მდე ლარი დახარჯა, მაგრამ დღემდე მუნიციპალიტეტის თხუთმეტამდე სოფელს გაზი კვლავ არ მიეწოდება.
გადახდილი მილიონებისა და არაჯეროვნად შესრულებული სამუშაოების მიუხედავად, მოსახლეობა კვლავ ვერ სარგებლობს ბუნებრივი აირით, რაც კორუფციასა და უუნარობაზე მიგვითითებს. მოვითხოვთ, ადგილობრივი ხელისუფლება პასუხისმგებლობით მოეკიდოს საკითხს და არაერთგზის მოტყურბულ მოსახლეობას გასცეს პასუხი,” – განაცხადა ლაშა კომახიძემ მედიასთან საუბრისას.
ინფორმაციისთვის: ანალოგიური მდგომარეობაა ხელვაჩაურის მუნიციპალიტეტშიც.
