ხულოს მუნიციპალიტეტის მერიასა და მის დაქვემდებარებაში არსებულ ა(ა)იპ-ებში დასაქმებულებმა აპრილში კუთვნილი ხელფასები დაგვიანებით მიიღეს.
როგორც „აჭარა თაიმსისთვის“ გახდა ცნობილი, საჯარო მოხელეებს ანაზღაურება დაახლოებით 20 დღის დაგვიანებით ჩაერიცხათ. მათი თქმით, მერიამ ხელფასების დაგვიანების მიზეზად ბიუჯეტში ფინანსური რესურსების არარსებობა დაასახელა.
„ყველა დასაქმებულს დაგვიგვიანდა ხელფასი. ზოგმა კერძო სესხის აღებით გადაიხადა საბანკო ვალდებულება. გვითხრეს, რომ ფული უბრალოდ არ იყო“, – გვიყვება ერთ-ერთი თანამშრომელი, რომელმაც კონფიდენციალობის დაცვა გვთხოვა.
ამასთანავე, დასაქმებულები აცხადებენ, რომ ხულოს მერიაში მათ მკაცრად აფრთხილებენ ამ თემაზე საჯაროდ არ ისაუბრონ. როგორც რამდენიმე წყარო გვიყვება, ხელმძღვანელობამ კატეგორიულად აუკრძალა თანამშრომლებს მედიასთან კომენტარის გაკეთება.
„დედაჩემი მერიაში მუშაობს. ანაზღაურება დაახლოებით 20 დღით დაუგვიანეს. მიზეზი არ ვიცით. უთხრეს, რომ არაფერი უნდა თქვას ამაზე საჯაროდ,“ – გვითხრა საჯარო მოხელის შვილმა.
ხელფასების დაგვიანებით გაცემის ფაქტი ხულოს მერმა დაგვიდასტურა, თუმცა მიზეზი ჯამბულატ მელაძემ არ განგვიმარტა.
“ორ ეტაპად გავეცით ხელფასები. დღგ-ს ნაწილში რაღაც პრობლემა იყო, შემოვიდა და მერე გავეცით შემოსავალი,” – გვითხრა ხულოს მერმა სატელეფონო საუბრისას.
ჯამბულატ მელაძეს შეფერხების გამომწვევი მიზეზის ახსნა ვთხოვეთ, თუმცა მან საჭესთან ყოფნის მიზეზით 2 წუთით დალოდება გვთხოვა, რის შემდეგაც საერთოდ აღარ გვიპასუხა.
ცნობისთვის: BM.GE-ის ინფორმაციით, 2025 წლის იანვარ-მარტში დღგ-ის, აქციზის, მოგების და იმპორტის გადასახადის გეგმა ვერ შესრულდა. ხაზინის მონაცემებით, აქედან ყველაზე დიდი ჩამორჩენა აქციზის ნაწილშია.
ბიუჯეტის შესრულების შესახებ ფინანსთა სამინისტროს ხაზინის ანგარიშის თანახმად, გადასახადების პირველი კვარტალის საპროგნოზო მოცულობა 5.3 მლრდ ლარი იყო, ხოლო მიღებულმა თანხამ 5.4 მლრდ ლარი, ანუ საპროგნოზო მოცულობის 102.3% შეადგინა.
გარემოება: რა გახდა დღგ-ის, აქციზის, მოგების და იმპორტის გადასახადის გეგმის ვერ შესრულების მიზეზი ამ ეტაპზე უცნობია. მთავრობას განმატება ამ დრომდე არ გაუკეთებია.
