ბათუმის რესპუბლიკური საავადმყოფოს ემერჯენსის ხელმძღვანელი ჯუმბერ ბოლქვაძე აცხადებს, რომ საქართველოსა და აჭარის ჯანდაცვის მინისტრების გადაწყვეტილებით, კლინიკის დატოვება მოსთხოვეს. მისი თქმით, მიზეზი მის მიერ შეხვედრაზე კლინიკაში არსებული პრობლემის შესახებ ღიად საუბარი გახდა.
საქმე ეხება ელექტრონულ პორტალს, რომლის საშუალებითაც კლინიკები სასწრაფო სამედიცინო დახმარების სამსახურს ატყობინებენ, აქვთ თუ არა პაციენტის მიღების რესურსი.
ბოლქვაძის განცხადებით, კონკრეტულ შემთხვევაში პორტალი ჩაკეტილი იყო, რაც იმას ნიშნავდა, რომ კლინიკას დამატებითი პაციენტის მიღების შესაძლებლობა არ ჰქონდა. შესაბამისად, პაციენტის მიღებაზე უარი ითქვა. ექიმის თქმით, პრობლემის მოგვარების ნაცვლად, კლინიკის ხელმძღვანელობამ მას თანამდებობის დატოვება მოსთხოვა.
ექიმების ინფორმაციით, 2026 წლის აგვისტოში ჯანდაცვის მინისტრმა, მიხეილ სარჯველაძემ, ჯუმბერ ბოლქვაძეს თანამდებობის დატოვება პირადად მოსთხოვა. ექიმების თქმით, აღნიშნული მოთხოვნა მინისტრმა შეხვედრაზე გააჟღერა, სადაც მან 112-ის ჩანაწერი წარადგინა. ჩანაწერში ისმის საუბარი მძიმე მდგომარეობაში მყოფი პაციენტის მიღებასთან დაკავშირებით. ჩანაწერში „ემერჯენსის“ ხელმძღვანელი ჯუმბერ ბოლქვაძე პაციენტის მიღებაზე უარს ამბობს, ხოლო ოპერატორის კითხვაზე, თუ სად უნდა გადაიყვანონ პაციენტი, პასუხობს: „წაიყვანეთ მინისტრთან“.
„უსამართლობაა, როცა ექიმს ექიმობიდან სთხოვ წასვლას. დირექტორმა მითხრა, მინისტრის ასეთი გადაწყვეტილებაა, განყოფილების გამგეობიდან წასვლა არაა საკმარისი და უნდა წახვიდე კლინიკიდან“, – ამბობს ჯუმბერ ბოლქვაძე ჩვენთან საუბრისას.
მას შესთავაზეს დაქვეითება და სხვა კლინიკაში სამუშაოდ გადასვლა. გადაწყვეტილებას რესპუბლიკური საავადმყოფოს თანამშრომლების ნაწილი არ ეთანხმება. პერსონალი ექიმს სოლიდარობას უცხადებს და აცხადებს, რომ მომხდარს უსამართლოდ მიიჩნევს და მის წინააღმდეგ ბრძოლას გეგმავს.
„აჭარა თაიმსი“ აჭარის ჯანდაცვის სამინისტროს დაუკავშირდა. უწყებაში გვითხრეს, რომ საკითხზე კომენტარს არ გააკეთებენ.
თვეებია ბათუმის რესპუბლიკური საავადმყოფოს ემერჯენსში კრიტიკულად მნიშვნელოვანი მედიკამენტები არ აქვთ
