შინაგან საქმეთა სამინისტროს ინფორმაციით, სარფის სასაზღვრო გამშვები პუნქტის ტერიტორიაზე დააკავეს უკრაინის მოქალაქე, 1992 წელს დაბადებული ვ.კ., რომელსაც ბრალად ედება განსაკუთრებით დიდი ოდენობით ნარკოტიკული საშუალების – „მეტადონის“ – უკანონო შეძენა-შენახვა და საქართველოს ტერიტორიაზე უკანონო შემოტანა.
სამინისტროს განცხადებაში აღნიშნულია, რომ ნარკოტიკული ნივთიერება პოლიციამ ბრალდებულის პირადი ჩხრეკის შედეგად აღმოაჩინა. გამოძიება მიმდინარეობს საქართველოს სისხლის სამართლის კოდექსის 260-ე და 262-ე მუხლებით, რაც განსაკუთრებით დიდი ოდენობით ნარკოტიკული საშუალების უკანონო შეძენა-შენახვასა და საზღვარზე უკანონო გადაადგილებას ეხება.
აღნიშნული დანაშაული 20 წლამდე ან უვადო თავისუფლების აღკვეთას ითვალისწინებს. შსს-ის ცნობით, ვ.კ. დაკავებულია ბრალდებულის სახით და გამოძიება გრძელდება.
