ხულოს კლინიკის თანამშრომლები გაფიცვასა და პროტესტს აანონსებენ. ამბობენ, რომ იმ შეთხვევაში თუ სამედიცინო დაწესებულების მენეჯმენტი მათ მოთხოვნებს არ გაითვალისწინებს ისინი პროფესიული მოვალეობის შესრულებაზე უარს იტყვიან.
ექიმების თქმით, კლინიკის ადმინისტრაცია სამეანო განყოფილებაში კადრებისა და სამუშაო საათების შემცირებას გეგმავს, რაც დახურვის ტოლფასია. მიმართვაში, რომელსაც ექიმები ავრცელებენ ყვებიან, რომ სამშობიარო ბლოკი მაღალთიან აჭარაში ერთადერთია და ის ხულოს გარდა შუახევის მუნიციპალიტეტსაც ემსახურება.
“ვემიჯნებით კლინიკის გადაწყვეტილებას, თუ ჩვენი მოთხოვნები არ დაკმაყოფილდება ვხურავთ კარებს და ყველანი გავდივართ გარეთ,” – ამბობენ ექიმები ვიდეო მიმართვისას.
“აჭარა თაიმსი” კომენტარისთვის ხულოს კლინიკის დირექტორს დაუკავშირდა. ნიკა ბოლქვაძის მტკიცებით, თანამშრომლების შემცირება და სამშობიარო განყოფილების დახურვა არ იგეგმება. გარდა ამისა, ბოლქვაძის თქმით, სამუშაო საათების შემცირება მოქმედ რეგულაციებთანაა დაკავშირებული და გადაწყვეტილებები სწორედ ამას ეფუძნება.
ნიკა ბოლქვაძე, ხულოს კლინიკის დირექტორი: სამეანო ბლოკი არ იხურება, პირიქით განვითარებას ვგეგმავთ, მათ შორის არც თანამშრომლების გათავისუფლებას ვაპირებთ. ამ ეტაპზე საუბარია იმაზე, რომ საათობრივი გრაფიკები შეიცვალა და დატვირთვის შესაბამისი იქნება. ეს გადაწყვეტილება მარეგულირებელ ფარგლებს არ სცდება. ყველაფერი პაციენტის რაოდენობის შესაბამისი უნდა იყოს, ამ მოთხოვნებს უნდა ვაკმაყოფილებდეთ.
აჭარა თაიმსი: გასაგებია, რომ რეგულაციების შესაბამისად განსაზღვრავს კლინიკა სამუშაო საათებს, თუმცა მეორეს მხრივ ეს იმას ნიშნავს, რომ დასაქმებულებს შემოსავალი მნიშვნელოვნად უმცირდებათ. თქვენ არ ფიქრობთ თანამშრომლების შრომის პირობებზე?
ნიკა ბოლქვაძე, ხულოს კლინიკის დირექტორი: (პაუზა) ყველა გადაწყვეტილება გამყარებულია რეგულაციების შესაბამისად. კლინიკის ფუნქციონირება ბევრ კომპონენტზეა დამოკიდებული, თუ წესის მიხედვით არ ვიმოქმედეთ მაშინ სამედიცინო დაწესებულება დახურვის წინაშე აღმოჩნდება.
აჭარა თაიმსი: თანამშრომლები ამბობენ, რომ პროტესტის უკიდურეს ფორმას მიმართავენ და უარს იტყვიან პროფესიული მოვალეობის შესრულებაზე. ამაზე გიფიქრიათ, თუ ასე მოხდა, მაშინ როგორ გააგრძელებს სამეანო განყოფილება ფუნქციონირებას? რას უპასუხებდით იმ თანამშრომლებს, რომლებიც უკმაყოფილებას გამოთქვამენ?
ნიკა ბოლქვაძე, ხულოს კლინიკის დირექტორი: კანონის ფარგებში გავაგრძელებთ საქმიანობას. ჩვენ ყველა თანამშრომელს პატივს ვცემთ და კომუნიკაციის პრობლემა არ გვაქვს. გადავჭრით მაგ პრობლემებს ისე, რომ კლინიკის ფუნქციონირებას საფრთხე არ შეექმნას.
