ბათუმში ველოსპორტში ჩემპიონატი მიმდინარეობს. 28 მაისს სტარტი აიღო „აჭარის ღია ჩემპიონატმა 2026-მა“. შეჯიბრებაში მონაწილეობენ სპორტსმენები საქართველოს სხვადასხვა რეგიონიდან, ასევე უცხოელი სტუმრები.
ტურნირი ორ კატეგორიად იყოფა: ვაჟები და გოგონები. ვაჟებში ორი ასაკობრივი ჯგუფია – იუნიორები (2008–2012 წლებში დაბადებულები) და ელიტა (2007 წელს დაბადებულები და უფროსები). გოგონებში კი ერთი საერთო ჯგუფია – 2012 წელს დაბადებულები და უფროსები.
„აჭარის ღია ჩემპიონატი 2026“ ოთხი ეტაპისგან შედგება და ოთხ დღეზეა გადანაწილებული. თითოეულ ეტაპზე გამოვლინდება რბოლის გამარჯვებული, ხოლო საერთო ჩემპიონი ოთხივე ეტაპზე დაგროვებული ქულების მიხედვით გამოვლინდება.
პირველი ეტაპი 28 მაისს გაიმართა და ინდივიდუალური რბოლა იყო. მეორე ეტაპი 29 მაისს გაიმართება – ჯგუფური რბოლა. დისტანცია 80 კილომეტრია, ხოლო მცირე ასაკობრივი ჯგუფისთვის – 40-50 კილომეტრი. სტარტი ბათუმში აიღება, ფინიში კი ხულოს ცენტრში იქნება.
მესამე ეტაპი 30 მაისს ქობულეთში გაიმართება და წრიული რბოლის ფორმატში ჩატარდება. ერთი წრის სიგრძე ორი კილომეტრია, საერთო ჯამში კი მონაწილეებმა 20 წრე უნდა გაიარონ.
ფინალური, მეოთხე ეტაპი 31 მაისს ბათუმში გაიმართება, ასევე წრიული რბოლის ფორმატში. ერთი წრის დისტანცია 1.6 კილომეტრი იქნება, ჯამში კი მონაწილეებს 20 წრის გავლა მოუწევთ.
აღსანიშნავია, რომ „აჭარის ღია ჩემპიონატში“ პროფესიონალი ველოსპორტსმენების გარდა, მონაწილეობა მოყვარულებსაც შეუძლიათ, შესაბამისი ეკიპირების შემთხვევაში.
ავტორი: დიმიტრი გორგილაძე
