ბათუმში მდებარე ხელოვნური განაყოფიერების, დონაციისა და სუროგაციის ცენტრ BIRTH-ში საგამოძიებო ასევე, საპროცესო მოქმედებები ჩატარდა, ამის შესახებ ინფორმაციას პროკურატურა ავრცელებს.
უწყების ცნობით, სამართალდამცველებმა სამედიცინო კლინიკიდან დოკუმენტაცია და ელექტრონული ინფორმაცია ამოიღეს.
“ამ ეტაპზე, საერთაშორისო გამოძიების ფარგლებში, საგამოძიებო და საპროცესო მოქმედებები გრძელდება, მათ შორის დაგეგმილია საქართველოს და ისრაელის მოქალაქეების მოწმის სახით გამოკითხვა,” – წერია პროკურატურის მიერ გავრცელებულ ინფორმაციაში.
პროკურატურის განცხადებას კლინიკა წერილობით გამოეხმაურა, რომელსაც უცვლელად გთავაზობთ:
ჭორები ჩვენი სიკვდილის შესახებ გადაჭარბებულია!
კლინიკა BIRTH მრავალი წელია ფუნქციონირებს საქართველოს კანონმდებლობისა და ისრაელის ჯანდაცვის სამინისტროს რეკომენდაციების შესაბამისად და კიდევ დიდხანს გაუწევს პაციენტებს სამედიცინო მომსახურებას. დღეს ბევრი მადლიერი პაციენტი მხარდაჭერას გვიცხადევს და გვჯერა, რომ მათი რიცხვი მუდმივად გაიზრდება. მადლობა ჩვენს პაციენტებს ამისთვის!
გვსურს გამოვეხმაუროთ გახმაურებულ ამბავს და განვმარტოთ ფაქტებით:
ჩვენს კლინიკაში დონორი კვერცხუჯრედის და მშობლების ბიოლოგიური სპერმის გამოყენებით მართლაც იქმნება ემბრიონები და იგზავნება ისრაელში მომავალი დედის საშვილოსნოში გადასატანად.
ნებისმიერი დონორის სისხლი 427 გენეტიკურ პათოლოგიაზე მოწმდება გენეტიკურ ლაბორატორიაში აშშ-ში, ლოს-ანჯელესში. ვინაიდან ისრაელის ჯანდაცვის სამინისტრო, დონორის გამეტების გამოყენების შესაძლებლობის დადგენისას, მოითხოვს მხოლოდ 5 გენის გამოკვლევას, ჩვენ ვაკვირდებით ამ ხუთი გენის შედეგებს და თუ ისინი უარყოფითია, მაშინ დონორს უფლება აქვს გაიაროს შემდგომი პროცედურები.
განხილულმა დონორმა აღნიშნულ 5 გენზე უარყოფითი დასკვნა მიიღო (ჰემოფილია ამ სიაში არ შედის) და ამიტომ მიიღეს გადაწყვეტილება იმ კონკრეტული დონორის კვერცხუჯრედებით მომხდარიყო განაყოფიერება, რომელიც მშობლებმა აირჩიეს. ასევე, აღსანიშნავია, რომ ისრაელის კლინიკის ექიმებს და მათ პაციენტებსა მიეწოდათ დონორის სრული გენეტიკური ანალიზის შედეგები (427 გენზე) და გადაეგზავნათ დონორის სისხლის ორი სინჯი, რათა საჭიროების შემთხვევაში შეძლებოდათ დამატებითი კვლევის ჩატარება ისრაელში.
აქვე უნდა აღინიშნოს, რომ კონკრეტული დონორის კვერცხუჯრედებიდან და პაციენტის საკუთარი სპერმატოზოიდით შექმნილი ემბრიონის გამოყენებაზე პასუხისმგებლობა ეკისრება პაციენტებს და მათ ექიმებს, რომლებსაც შეუძლიათ ჩაატარონ დამატებითი კვლევა ემბრიონების და დონორის სისხლის გამოყენებით.
ჩვენი ყველა ქმედება სრულად შეესაბამებოდა საქართველოსა და ისრაელის ჯანდაცვის სამინისტროების პროტოკოლებს. თუ ისრაელში რეცესიული ჰემოფილიის გენის მქონე უჯრედების გამოყენება კატეგორიულად აკრძალულია, მაშინ რატომ არ შეიტანა ისრაელის ჯანდაცვის სამინისტრომ ეს პათოლოგია სავალდებულო გენების კვლევის სიაში? რატომ არ გაკეთდა დამატებითი ანალიზები დონორის სისხლზე, რომელიც გადაგზავნილი იყო ისრაელში?
ისრაელის მედიაში დაუზუსტებელი ინფორმაცია გავრცელდა ემბრიონების გამოყენებაზე. რეალურად კი დაიბადა ერთი გოგონა, რომელიც არის ჰემოფილიის მატარებელი და მის სიცოცხლეს საფრთხე არ ემუქრება, მეორე შემთხვევაში კი ორსულობა მშობლების გადაწყვეტილებით შეწყდა;
სიცრუეს წარმოადგენს ისიც, რომ დონორი არის მუსლიმი აზერბაიჯანელი ქალი და ვიღაც ცდილობს შექმნას შთაბეჭდილება, რომ ჩვენ და ჩვენმა პარტნიორმა ექიმებმა განვახორციელეთ მიზანმიმართული ბოროტი ქმედება ისრაელში ჰემოფილიის გასავრცელებლად.
ფაქტობრივად, დონორი საქართველოდანაა, ჯანმრთელია და ჯანმრთელი შვილები ჰყავს. მსოფლიოში ცნობილი ფაქტია, რომ ჰემოფილიის გენის გადაცემის ალბათობა მხოლოდ მამაკაცებშია და ისიც 20 000-დან ერთ შემთხვევაში, ამიტომ მშობელი წყვეტს, გააჩინოს თუ არა ამ გენის მატარებელი ბავშვი.
ისრაელის მასმედია (ან შესაძლოა ჯანდაცვის სამინისტრო, რათა დამალოს თავისი შეცდომა, რომ ჰემოფილია არ აქვთ შეტანილი დონაციის აკრძალვების სიაში; ან შესაძლოა პოლიცია, რომელიც დანაშაულის წინააღმდეგ ბრძოლაში დიდი „წარმატების“ ფონზე, საჭიროებს გარკვეული აქტივობის ჩვენებას) ამ საქმეს უწოდებენ “თაღლითობას”. ეს ტერმინი მინდა განვმარტო შეესაბამება, როცა მიზანმიმართულად ხდება ზიანის მიყენება. ეს კი გამორიცხულია ჩვენი პარტნიორი ებრაელი ექიმების მხრიდან, რომლებმაც 40 წლის განმავლობაში 10 000-ბით ოჯახი გააბედნიერეს;
გუშინ დილით კლინიკაში იმყოფებოდნენ პროკურატურის წარმომადგენლები და მათ გადავეცით პროცედურების სისწორისა და პროტოკოლის შესაბამისობის დამადასტურებელი ყველა დოკუმენტი.
მადლობა ჟურნალისტებს ჩვენი აზრის დაფიქსირების შესაძლებლობისთვის. ვიმედოვნებთ სიმართლე დროთა განმავლობაში დადგინდება, თუმცა გარანტიას გაძლევთ, რომ ჩვენს კლინიკას ვერ დაეკისრება პასუხისმგებლობა აღნიშნულ ფაქტზე.
ჩვენ ვაგრძელებთ მუშაობას ეფექტიანად და კანონის სრული დაცვით.
პატივისცემით, ლევ ადიროვიჩი, კლინიკა BIRTH-ის დირექტორი.
