საქსტატის ოფიციალური მონაცემებით, ბოლო 10 წლის განმავლობაში (2015-2024) საქართველოდან ემიგრაციაში წავიდა 810,300 მოქალაქე, ხოლო ქვეყანაში დაბრუნდა მხოლოდ 566,600 – რაც 243,700 მოქალაქით ნეგატიურ მიგრაციულ ბალანსს ნიშნავს, წერს “ინფორმაციის თავისუფლების განვითარების ინსტიტუტი”.
განსაკუთრებით საგანგაშოა ახალგაზრდების ემიგრაცია: აღნიშნულ პერიოდში საქართველოდან ემიგრაციაში წავიდა 30 წლამდე ასაკის 378,175 მოქალაქე, თუმცა დაბრუნდა მხოლოდ 207,300 – განსხვავება 170,800 მოქალაქეს შეადგენს.
მიუხედავად ამისა, 2024 წელს მიგრაციული სალდო ზოგადად დადებითია – ქვეყანაში დაბრუნებულთა რაოდენობა 842-ით აჭარბებს წასულების რაოდენობას. ექსპერტების შეფასებით, ამ პოზიტიურ ტენდენციას ხელი შეუწყო ევროკავშირის ქვეყნებიდან საქართველოს მოქალაქეების რეადმისიის მაჩვენებლის ზრდამ.
თუმცა, ახალგაზრდებში ნეგატიური ტენდენცია შენარჩუნდა – მხოლოდ 2024 წელს ქვეყნიდან 30 წლამდე ასაკის 5,347 მოქალაქით მეტი წავიდა, ვიდრე დაბრუნდა.
რუსეთ-უკრაინის ომის დაწყების შემდეგ, 2022-2024 წლებში საქართველოდან ემიგრაციაში 117,100-ით მეტი მოქალაქე წავიდა, ვიდრე დაბრუნდა. ამავე პერიოდში საქართველოში საცხოვრებლად დარჩნენ სხვადასხვა ქვეყნის მოქალაქეები, მათ შორის:
- რუსეთის – 71,600;
- უკრაინის – 21,200;
- ბელარუსის – 11,400;
- ინდოეთის – 9,000;
- თურქეთის – 6,000;
- აზერბაიჯანის –5,800.
ექსპერტების შეფასებით, საქართველოს მიგრაციულ სურათზე ზეგავლენას ახდენს როგორც შიდა ეკონომიკური გამოწვევები, ისე გეოპოლიტიკური პროცესები რეგიონში.
