ისტორიაში პირველად, საქართველოს გოგონათა ახალგაზრდულმა ნაკრებმა მშვილდოსნობაში ევროპის თასზე მედალი მოიპოვა. ბრინჯაოს მედალს საქართველოს ნაკრები ბულგარეთში გამართულ ევროპის თასის პირველ ეტაპზე დაეუფლა. გუნდის შემადგენლობაში ასპარეზობდნენ ანა ბოლოკაძე, ნია გათენაძე (აჭარის ნაკრები) და ელენიკა ეფრემიძე.
საქართველოს ნაკრებმა შესანიშნავი ასპარეზობა საკვალიფიკაციო ეტაპზევე დაიწყო და მეოთხედფინალში ავტომატურად გადაინაცვლა. ამ ეტაპზე ქართველი გოგონები პოლონეთის ნაკრებს დაუპირისპირდნენ და დამაჯერებლად, ანგარიშით 6:0 დაამარცხეს. ნახევარფინალში საქართველოს გუნდი იტალიას შეხვდა, თუმცა დაძაბულ ბრძოლაში 2:4 დამარცხდა.
ბრინჯაოს მედლისთვის ბრძოლაში საქართველოს ნაკრები ჩეხეთის წინააღმდეგ გავიდა და კიდევ ერთხელ დამაჯერებელი გამარჯვება მოიპოვა — 6:0. ეს გამარჯვება მნიშვნელოვან მოვლენას წარმოადგენს საქართველოს მშვილდოსნობის ისტორიაში, რადგან ეს არის პირველი მედალი, რომელიც გოგონათა ახალგაზრდულმა ნაკრებმა ევროპის თასზე მოიპოვა.
