ძველი ბათუმის ტერიტორიაზე მდებარე ისტორიულ შენობაზე მიმდინარე სამუშაოების კანონიერების შესწავლას პარტია „თავისუფლების მოედნის“ წევრი აზა გაბუნია და „ძლიერი საქართველო-ლელოს“ წევრი ვაჟა დარჩია ითხოვენ.
აზა გაბუნიამ აჭარის კულტურული მემკვიდრეობის დაცვის სააგენტოს ოფიციალურად მიმართა და შენობაზე მიმდინარე სამუშაოებთან დაკავშირებით შესაბამისი დოკუმენტაციისა და ინფორმაციის გასაჯაროება მოითხოვა.
მისი მოთხოვნა მოიცავს სააგენტოსთან შეთანხმებულ თავდაპირველ პროექტს და მასში შეტანილ ცვლილებებს, გაცემულ ნებართვებს, ბრძანებებსა და სხვა ადმინისტრაციულ აქტებს, ასევე კომისიებისა და საბჭოების სხდომების ოქმებსა და გადაწყვეტილებებს.
გაბუნია ასევე ითხოვს ინფორმაციას მესაკუთრისა და სხვა დაინტერესებული პირების მიერ სააგენტოში წარდგენილი დოკუმენტების, ასევე სააგენტოს მიერ ჩატარებული მონიტორინგისა და ინსპექტირების შესახებ.
მისი თქმით, მნიშვნელოვანია დადგინდეს, დაირღვა თუ არა სამუშაოების მიმდინარეობისას გაცემული ნებართვის ან შეთანხმებული პროექტის პირობები და, დარღვევის არსებობის შემთხვევაში, რა სამართლებრივი რეაგირება განხორციელდა ან მიმდინარეობს.
„თავისუფლების მოედნის“ წევრი ასევე ითხოვს, რომ სამუშაოებთან დაკავშირებული შესაბამისი დოკუმენტაცია საზოგადოებისთვის ხელმისაწვდომი გახდეს.
დღესვე აჭარის კულტურული მემკვიდრეობის დაცვის სააგენტოსა და ბათუმის მერიას მიმართა „ძლიერი საქართველო-ლელოს“ წევრმა ვაჟა დარჩიამაც.
დარჩია ითხოვს, დადგინდეს, რამდენად კანონიერად მიმდინარეობს მე-19 საუკუნის კულტურული მემკვიდრეობის ძეგლზე სარესტავრაციო და სამღებრო სამუშაოები. მისი განცხადებით, შესაბამისმა უწყებებმა უნდა გაასაჯაროონ ძეგლზე მიმდინარე სამუშაოებთან დაკავშირებული ყველა შეთანხმებული დოკუმენტი.
„გვინდა, ამ დოკუმენტაციის საფუძველზე ვნახოთ, რამდენად კანონიერად მიმდინარეობს სამუშაოები. აღნიშნული ძეგლი ეროვნული მნიშვნელობის მქონე მემკვიდრეობაა და აუცილებელია, საზოგადოების კითხვებს გაეცეს პასუხი“, – განაცხადა ვაჟა დარჩიამ.
საკრებულოს წევრი ასევე ითხოვს საკითხის შესასწავლად დროებითი სამუშაო ჯგუფის შექმნას. მისი თქმით, ჯგუფმა უნდა შეაფასოს როგორც უკვე შესრულებული, ისე მიმდინარე სამუშაოების შესაბამისობა კულტურული მემკვიდრეობის დაცვის კანონმდებლობასთან.
შეგახსენებთ, ბათუმში მე-19 საუკუნის კულტურული მემკვიდრეობის ძეგლის ფასადი მკვეთრ ფერებში შეიღება, რასაც საზოგადოებისა და სოციალურ ქსელებში მომხმარებლების კრიტიკა მოჰყვა. კრიტიკის შემდეგ ისტორიული შენობა სამშენებლო ბადით შეფუთეს.
ბათუმში მე-19 საუკუნის კულტურული მემკვიდრეობის ძეგლის ფასადი უნებართვოდ შეღებეს
