„ქართული ოცნების“ სახელმწიფო უსაფრთხოების სამსახურისი მტკიცებით, „კამიტის“ – წინა საუკუნის 30-იან წლებში აკრძალული ქიმიური ნივთიერების – გამოყენების შესახებ BBC-ის ფილმში გავრცელებული ვერსია არ დასტურდება და მიზანმიმართული დეზინფორმაციას წარმოადგენს.
უწყების ცნობით, საგამოძიებო მოქმედებები ამ მიმართულებით დასრულებულია, თუმცა გრძელდება გამოძიება სხვა შესაძლო დანაშაულზე, რომელიც უცხოეთის ორგანიზაციისთვის მტრულ საქმიანობაში დახმარებას შეეხება.
სუს-ის ხელმძღვანელის პირველი მოადგილის, ლაშა მაღრაძის თქმით, უწყებამ გამოავლინა „უტყუარი მტკიცებულებები“, რომლებიც BBC-ის ფილმში მოყვანილ ბრალდებებს უსაფუძვლოს ხდის. მისი განცხადებით, გავრცელებული ინფორმაცია ემსახურება საქართველოს ინტერესების დაზიანებას, ხოლო მტრული კამპანიის ორგანიზებაში, როგორც ის ამბობს, „სამწუხაროდ, საქართველოს მოქალაქეებიც არიან ჩართულები“.
„BBC-ის ფილმში მოყვანილი ე.წ. ქიმიური იარაღის – „კამიტის“ – გამოყენების შესახებ ინფორმაცია სრულიად გამოგონილი და მიზანმიმართული დეზინფორმაციაა. ეს წარმოადგენს კარგად ორგანიზებულ კამპანიას ჩვენი ქვეყნის წინააღმდეგ,“ – აღნიშნა მაღრაძემ.
სუს-ის ცნობით, მას შემდეგ, რაც „კამიტის“ გამოყენების გამოგონილ ფაქტზე გამოძიება დასრულდა, სამსახური მუშაობას აგრძელებს საქართველოს სისხლის სამართლის კოდექსის 319-ე მუხლით გათვალისწინებულ შესაძლო დანაშაულზე, რაც უცხოეთის ორგანიზაციისთვის მტრულ საქმიანობაში დახმარებას გულისხმობს.
