„საკალათბურთო კლუბ ბათუმის“ რიგებიდან 2026 წლის All Star-ში ოთხი კალათბურთელი იასპარეზებს, რაც საქართველოს სუპერლიგის გუნდებს შორის ყველაზე მაღალი მაჩვენებელია. „ვარსკვლავების მატჩის“ მონაწილეები ორ გუნდად არიან დაყოფილნი – „ადგილობრივები“ და „ლეგიონერები“.
„ს/კ ბათუმის“ ოთხივე კალათბურთელი საწყისი ხუთეულის მოთამაშეა. ლევან ბაბილოძე, გიორგი ოჩხირიძე და აკაკი დვალიშვილი „ადგილობრივების“ გუნდში ითამაშებენ, ხოლო „ლეგიონერების“ გუნდს ბათუმიდან მაირინ ტომასი წარმოადგენს.
ვარსკვლავების მატჩის გარდა, All Star 2026-ის ფარგლებში გაიმართება სამქულიანებისა და ჩატენვების (ე.წ. Dunk) კონკურსებიც. ჩატენვების კონკურსში ლუკა ხარაბაძეს (ორბი) და ვატო გაჩეჩილაძეს (ვსა) „ს/კ ბათუმის“ კალათბურთელი მაირინ ტომასი დაუპირისპირდება.
All Star 2026-ის ორივე გუნდში 12-12 მოთამაშე იქნება — აქედან 5-5 ხალხის რჩეული, ხოლო 7-7 ლიგის საუკეთესო კალათბურთელი. გუნდების მთავარი მწვრთნელები დავით ნიზაძე („ადგილობრივები“) და ბექა წივწივაძე („ლეგიონერები“) იქნებიან.
All Star-ის მატჩი 25 იანვარს, 16:00 საათზე, რუსთავის სპორტის სასახლეში გაიმართება.
ავტორი: დიმიტრი გორგილაძე
