AJARATIMES.GE-ის ინფორმაციით, ბათუმში, ტბელ აბუსერიძის ქუჩის N23-ში ოთხის ნაცვლად 40 სართულიანი კორპუსი აშენდება, რომლის სიმაღლე 120 მეტრამდე იქნება. ტერიტორიაზე ძველი საბჭოთა დროინდელი კორპუსის დემონტაჟი მალე დაიწყება, მანამდე კი კომპანიამ ტერიტორია შეღობა. ნებართვას ხელს ბათუმის მერი, არჩილ ჩიქოვანი აწერს.
მბათუმის ერიიდან გამოთხოვილ საჯარო ინფორმაციაში ვკითხულობთ, რომ მრავალსართულიან შენობას შპს “სკაილაინ გრუპი” აშენებს, რომლის დირექტორი, საჯარო რეესტრის მონაცემებით, გიორგი შარაშიძეა.
ინფორმაციისთვის: ამავე ეზოში დაახლოებით ერთი წლის წინ გაკეთებული სკვერი, რამდენიმე დღის წინ დაანგრიეს, ვინაიდან რეკრეაციული ზოლი სამშენებლო მოედნად შემოისაზღვრა.
აღნიშნულ ეზოში მაღალჩინოსანი ძმები ბერიძეები ცხოვრობენ და თავის დროზე, მეზობლების თქმით, ყველაფრით უზრუნველყოფილი სკვერი, სწორედ მათი გავლენების შედეგად კეთილმოაწყვეს. მეზობლებს კი შედარებით დაბალბიუჯეტიანი სკვერი შერჩათ. მეზობლებს შორის უკმაყოფილებაზე „აჭარა თაიმსი“ დეკემებერში წერდა.
ცნობისთვის, ძმები ბერიძეები საეჭვო კორუფციულ გარიგებებში ფიგურირებენ. „საერთაშორისო გამჭვირვალობა საქართველოს“ კვლევის თანახმად, ტენდერებს იგებენ ის კომპანიები, რომლებიც მაღალჩინოსნებთან სხვადასხვა ფორმით არიან კავშირში.
რატომ დაანგრიეს ახლადრეაბილიტირებული სკვერი – კითხვაზე ბათუმის მერიის საქალაქო ინფრასტრუქტურისა და კეთილმოწყობის სამსახურში არ გვიპასუხეს.
ამ კორპუსიდან რამდენიმე მეტრში, ტბელ აბუსერიძის ქუჩის N19-ში კიდევ ერთი მრავალსართულიანი შენდება. ორივე მშენებლობის ნებართვა ერთ პაკეტშია მოქცეული, მშენებელი კომპანიების სახელწოდებებიც თითქმის იდენტურია (შპს. სკაილაინ ჯგუფი და შპს სკაილაინ გრუპი).
ტბელ აბუსერიძის N19-ში მიმდინარე მშენებლობაზე “აჭარა თაიმსი” დეკემბერში წერდა. ჩვენი ინფორმაციით, ამ კონკრეტულ ტერიტორიაზე მშენებლობით “ქართული ოცნების” შემწირველი ვასილ ხორავაა დაინტერესებული. მან მმართველ პარტიას ფული ორჯერ ჩაურიცხა, ჯამში 13,000 ₾ ოდენობით. ვასილ ხორავა ასევე, რამდენიმე კომპანიის მეწილე და დირექტორია. ის წლების წინ “საქართველოს რკინიგზის” ინფრასტრუქტურის დირექტორი იყო.
