„დინამო ბათუმმა“ ბოლოს და ბოლოს შეწყვიტა 13 ტურის განმავლობაში მიმდინარე მოუგებელი სერია. გიორგი ჭიაბრიშვილის მიერ ხელმძღვანელებულმა გუნდმა ეროვნული ლიგის 34-ე ტურში სტუმრად „თელავს“ 1:2 სძლია და მნიშვნელოვანი სამი ქულა ჩაიწერა.
ბათუმელთა პირველი გოლი მატჩის 36-ე წუთზე კალანდარიშვილმა გაიტანა, ხოლო მეორე ბურთი 61-ე წუთზე მანდრიჩენკომ შემატა. შეხვედრის ბოლო წუთებში, 89-ე წუთზე, „დინამოს“ ჰქონდა შანსი მესამე გოლის გასატანად, თუმცა წულუკიძემ 11-მეტრიანი ვერ გამოიყენა.
მასპინძლებიდან ერთადერთი გოლი 68-ე წუთზე კუტალიამ გაიტანა.
აღსანიშნავია, რომ ბათუმური კლუბისთვის ეს პირველი გამარჯვებაა ეროვნული ლიგის მე-20 ტურის შემდეგ, როდესაც „თოლიებმა“ „გარეჯი“ მინიმალური სხვაობით – 0:1 დაამარცხეს.
„დინამო ბათუმი“ მომდევნო შეხვედრას 30 ნოემბერს ჩაატარებს და 35-ე ტურის მატჩში „სამგურალს“ დაუპირისპირდება.
ავტორი: დიმიტრი გორგილაძე
