თვითდასაქმებულებმა აჭარის მთავრობის სახლთან საპროტესტო აქცია გამართეს. ისინი წლების განმავლობაში ბათუმის ბულვარის ტერიტორიაზე ელექტრო სკუტერებსა და მოპედებს აქირავებენ და აცხადებენ, რომ მათი შემოსავლის ძირითადი წყარო სწორედ ეს საქმიანობაა.
აქციის მონაწილეების თქმით, გვიან ღამით, წინასწარი გაფრთხილების გარეშე, მუნიციპალური ინსპექციის თანამშრომლებმა მათი კუთვნილი სატრანსპორტო საშუალებები ტერიტორიიდან გაიტანეს, რის შედეგადაც საქმიანობა ფაქტობრივად შეუჩერდათ.
პროტესტის მონაწილეები აღნიშნავდნენ, რომ მიღებული გადაწყვეტილება მათ სოციალურ მდგომარეობას მნიშვნელოვნად აუარესებს. მათი თქმით, ოჯახების არსებობა სწორედ აღნიშნული საქმიანობიდან მიღებულ შემოსავალზეა დამოკიდებული, ხოლო ტურისტული სეზონის მოახლოების ფონზე საქმიანობის შეზღუდვა დამატებით პრობლემებს ქმნის.
აქციის მონაწილეებმა აჭარის მთავრობის თავმჯდომარესთან შეხვედრა მოითხოვეს, თუმცა მათი განცხადებით, სასაუბროდ არავინ გამოსულა. ისინი ამბობენ, რომ არსებული ვითარება მათთვის გაურკვეველია და მომავლის გეგმების დასახვა უჭირთ.
ამ დროისთვის უცნობია, რა გახდა ელექტრო ტრანსპორტის გაქირავების შეზღუდვის მიზეზი. საკითხზე ოფიციალური კომენტარი არ გაუკეთებია არც ბათუმის ბულვარის ადმინისტრაციას და არც აჭარის მთავრობას.
ინფორმაციისთვის: ბათუმის ბულვარში აქტიურად მიმდინარეობს კაფე-რესტორნების დემონტაჟიც. ზღვისპირა პარკის თითქმის მთელ მონაკვეთზე არსებული ობიექტები უკვე დაშლილია ან მათი დანგრევა მიმდინარეობს.
ცნობისთვის: პარალელურად, საქმიანობა შეუჩერეს მცირე მოვაჭრეებსაც, რომლებიც სუვენირებსა და ნატურალურ წვენებს ყიდდნენ. თვითდასაქმებულები აცხადებენ, რომ მათ არ აქვთ ინფორმაცია, შეძლებენ თუ არა მუშაობის განახლებას ან რა პირობებით მოხდება მათი საქმიანობის გაგრძელება.
აქვე დაგაინტერესებთ ⇓
- თვითდასაქმებულებმა არ იციან როდის გააგრძელებენ ვაჭრობას – პროტესტი აჭარის მთავრობასთან
- ახალ ბულვარში ფეკალური მასები ზღვაში ჩაედინება – სასტუმროებისა და აპარტამენტების მფლობელებს კანალიზაცია სანიაღვრე არხზე აქვთ დაერთებული
- „კლარას ჰოთ-დოგებით“ ცნობილ ობიექტს აღარ ანგრევენ
- დეპუტატის ოჯახის კომპანიამ ტენდერებიდან მილიონობით ლარი მიიღო – კვლევა
- ბათუმის ბულვარში მეუღლის მშობლების ბიზნესის მფარველობისთვის დაცვის პოლიციის თანამშრომელი დააკავეს
