მოქალაქე გიორგი გურგენიძე აცხადებს, რომ ბათუმის ღვთისმშობლის სახელობის ტაძრიდან არაერთხელ გამოაგდეს.
გიორგი გურგენიძე „აჭარა თაიმსთან“ საუბარში ამბობს, რომ ტაძრის სტიქაროსნები და ერთ-ერთი მღვდელი მის მიმართ სიტყვიერ შეურაცხყოფას იყენებდნენ და ემუქრებოდნენ.
მისი თქმით, დაპირისპირების მიზეზი ტაძარში მრევლის მიერ შეწირული პროდუქტებიდან მცირე რაოდენობის საკვების მოთხოვნა გახდა.
„ვთხოვდი მცირე საკვებს და ამის შემდეგ ჩემ მიმართ დამოკიდებულება შეიცვალა. ამის გამო მომიძულეს და ტაძარში აღარ მიშვებენ“, – ამბობს გიორგი.
გიორგი გურგენიძე შშმ პირია. მისი თქმით, ტაძარში მხოლოდ ლოცვაში არ მონაწილეობდა და ინვენტარის დასუფთავების პროცესშიც ერთვებოდა.
გიორგის დედა, მზიური ბალაძე, აცხადებს, რომ მისი შვილის მიმართ მსგავსი დამოკიდებულება პირველი არ არის. მისი თქმით, მომხდარის შესახებ ინფორმაცია სოციალური ქსელის საშუალებით ბათუმისა და ლაზეთის ეპარქიას მიაწოდა, თუმცა ამის შემდეგ, როგორც ამბობს, მის შვილზე ზეწოლა კიდევ უფრო გაიზარდა.
ბრალდებებთან დაკავშირებით განმარტების მიღების მიზნით „აჭარა თაიმსი“ ბათუმისა და ლაზეთის ეპარქიის საზოგადოებასთან ურთიერთობის სამსახურს დაუკავშირდა. გვითხრეს, რომ კითხვები წერილობით მიგვეწოდებინა, თუმცა ორდღიანი ლოდინის მიუხედავად, პასუხი ვერ მივიღეთ.
„აჭარა თაიმსი“ ეპარქიის პოზიციის მიღების შემთხვევაში მასალას განაახლებს.
