ფინანსთა სამინისტროს საგამოძიებო სამსახურის ინფორმაციით, საბაჟო საზღვარზე განსაკუთრებით დიდი ოდენობით ოქროს საიუველირო ნაკეთობების უკანონო გადმოტანის ფაქტზე ერთი პირი დააკავეს.
უწყების ცნობით, გამოძიება შემოსავლების სამსახურის საბაჟო დეპარტამენტთან და საქართველოს გენერალურ პროკურატურასთან კოორდინაციით ჩატარებული ოპერატიულ-სამძებრო და საგამოძიებო მოქმედებების შედეგად დაიწყო.
გამოვლინდა, რომ საქართველოს მოქალაქემ საბაჟო-გამშვები პუნქტი „სარფის“ გავლით, მის მართვაში არსებული ავტომობილით, სხვადასხვა ნივთში მალულად დამალული 1 215.52 გრამი ოქროს საიუველირო ნაკეთობები შემოიტანა.
დაკავებული ოქროს ნაკეთობების საბაჟო ღირებულება 246 857 ლარს შეადგენს. გამოძიება საქართველოს სისხლის სამართლის კოდექსის 214-ე მუხლის მე-2 ნაწილით მიმდინარეობს, რაც სასჯელის სახით 5-დან 7 წლამდე თავისუფლების აღკვეთას ითვალისწინებს.
