მაღალმთიან აჭარაში, უფასო სასადილოს ყველაზე მეტი ბენეფიციარი ხულოს ჰყავს. სოციალურად დაუცველი ფენისთვის გათვალისწინებული ყოველდღიური უფასო კვებით მუნიციპალიტეტში 53 ადამიანი სარგებლობს.
ხულოს მერმა “აჭარა თაიმს” საჯარო ინფორმაცია არასრულყოფილად, უფრო მეტიც, კანონით დადგენილი ვადის დარღვევით მიაწოდა. ვახტანგ ბერიძემ არ მოგვაწოდა კონკრეტული ინფორმაცია სასადილოს მენიუსა და თითოეული ბენეფიციარისთვის განკუთვნილი ულიფის შესახებ. ამგვარად უცნობი რჩება, რამდენ ლარს ხარჯავს მუნიციპალიტეტი ერთი ადამიანის გამოკვებაზე.
ხულოს მერიამ ასევე, არ უპასუხა კითხვას თუ რამდენი ადამიანია დასაქმებული სასადილოში და რა არის მათი ყოველთვიური ანაზღაურება. უწყებიდან მოწოდებულ საჯარო ინფორმაციაში მხოლოდ ის წერია, რომ მერია ამ მიმართულებით წლიურად, 50 240 ლარს ხარჯავს.
შუახევის მუნიციპალიტეტში ერთი უფასო სასადილო ფუნქციონირებს, რომლითაც 42 ბენეფიციარი სარგებლობს – მოგვწერეს უწებიდან. საჯარო ინფორმაციაში აღნიშნულია, რომ მენიუ მოიცავს 3 კომპონენტიან კვებას.
“2024 წელს უფასო სასადილოსთვის ადგილობრივი ბიუჯეტით გათვალისწინებულია 50 000 ლარი, აქედან კვებისთვის – 45 000 ლარი, ხოლო 5 000 ლარი კი რემონტისთვის. სასადილოში დასაქმებულია ერთი პირი. შრომის ანაზღაურება შეადგენს 440 ლარს,” – აცხადებენ შუახევის მერიაში.
ირკვევა, რომ ქედის მუნიციპალიტეტში მცხოვრები სოციალურად დაუცველი ფენისთვის უფასო სასადილოს კვებით უზრუნველყოფის პროგრამით ყოველწლიურად 25 ბენეფიციარი სარგებლობს. უწყებიდან მიღებულ საჯარო ინფორმაციაში აღნიშნულია, რომ 2024 წელს უფასო სასადილოსთვის 32 000 ლარია გათვალისწინებული.
ხულოს მუნიციპალიტეტის მსგავსად, ქედის მერიამაც არ მოგვაწოდა დეტალური ინფორმაცია დაწესებულებაში დასაქმებულ პირთა და მათი ანაზღაურების შესახებ, ასევე, თითოეულ ბენეფიციარზე რამდენი ლარია გათვალისწინებული.
ინფორმაციისთვის: “აჭარა თაიმსმა” აღნიშნული ინფორმაცია ხელვაჩაურისა და ქობულეთის მერიებისგანაც გამოითხოვა, თუმცა ორივე შემთხევაში უწყებებმა კანონი დაარღვიეს. 23 იანვარს გამოთხოვილი საჯარო ინფორმაცია დღემდე არ მიგვიღია.
