თორნიკე რიჟვაძემ შვილები კერძო, ძვირადღირებულ სკოლაში გადაიყვანა, ამის შესახებ „აჭარა თაიმს“ ბათუმის მერვე საჯარო სკოლის მშობლებმა აცნობეს, სადაც მანამდე და-ძმა რიჟვაძეები სწავლობდნენ. მშობლების თქმით, აჭარის მთავრობის თავმჯდომარის შვილები ყოფილ კლასელებს უკვე დაემშვიდობნენ და სწავლა კერძო სკოლაში გააგრძელეს.
ცნობისთვის: მერვე საჯარო სკოლა თორნიკე რიჟვაძის მეუღლემ, მაგდა მამულაძემაც დატოვა, რომელიც ამავე სკოლის პედაგოგი იყო.
„აჭარა თაიმსის“ წყაროების ცნობით, თორნიკე რიჟვაძემ შვილები სასწვლებლად ამერიკულ საერთაშორისო სკოლა „პროგრესში“ გადაიყვანა, სადაც წლიურად სწავლის საფასური ერთ მოსწავლეზე 8 000 ₾არამდე აღწევს, ამას ემატება წიგნებისა და ფორმის საფასურიც.
„აჭარა თაიმსი“ ინფორმაციის დაზუსტების მიზნით სკოლა „პროგრესის“ საზოგადოებასთან ურთიერთობის სამსახურს დაუკავშირდა, სადაც ფაქტი დაგვიდასტურეს, თუმცა დამატებითი განმარტებები დაწესებულებაში არ კეთდება. აჭარის განათლების მინისტრის თქმით, ფაქტის შესახებ არაფერი სმენია, შესაბამისად საკითხის შეფასება გაუჭირდება.
“სადმე გვიწერია, რომ მოსწავლისა და მშობლის არჩევანი შეზღუდულია? ჩვეულებრივად ხდება სკოლის არჩევა, ჩვენ ისევე ვუწყობთ კერძო სკოლების განვითარებას ხელს როგორც საჯაროს. ეს არის კონკურენტუნარიანი გარემოს შექმნა. მე ვერანაირ პრობლემას ვერ ვხედავ, რომ მხოლოდ საჯარო სკოლა იყოს პრიორიტეტული. საკითხს არ ვიცნობ და ვერ გეტყვით რატომ გადაიყვანა კერძო სკოლაში,” – განაცხადა “აჭარა თაიმსთან” საუბრისას მაია ხაჯიშვილმა, აჭარის განათლების მინისტრმა.
გვსურდა თორნიკე რიჟვაძისთვის გვეკითხა, რატომ ასწავლის შვილებს კერძო სკოლაში მაშინ, როცა მთავრობა ეფექტიანი განათლების სისტემის შესახებ მუდმივად საუბრობს და რას უნდა ნიშნავდეს ეს გადაწყვეტილება საზოგადოებისთვის. თუმცა, აჭარის მთავრობის თავმჯდომარე კრიტიკული მედიისთვის მიუწვდომელია. თორნიკე რიჟვაძე ძირითადად პროპაგანდისტულ, პროსამთავრობო მედიასაშუალებების ჟურნალისტებს ესაუბრება, რომლებიც წინასწარ შეთანხმებულ კითხვებს სვამენ.
თუ აჭარის მთავრობის თავმჯდომარე ამ საკითხზე განმარტების გაკეთებას ისურვებს, ცხადია, თორნიკე რიჟვაძეს ამის შესაძლებლობას მივცემთ და მასალა შესაბამისად განახლდება.
აქვე დაგაინტერესებთ:
- რა კაპიტალი ჰქონდა თანამდებობამდე თორნიკე რიჟვაძეს და რა აქვს ახლა
- რუსული კანონის მხარდამჭერი ჩინოვნიკები, რომელთა შვილები ევროპასა და ამერიკაში დაიბადნენ
