„მთავარი არხის“ ინფორმაციით, აჭარის ახალი, არალეგიტიმური მთავრობის თავმჯდომარე შესაძლოა შინაგან საქმეთა სამინისტროს თბილისის პოლიციის დეპარტამენტის დირექტორი, სულხან თამაზაშვილი გახდეს. აღნიშნულ ცნობებებს “აჭარა თაიმსის” რამდენიმე წყაროც ადასტურებს.
სულხან თამაზაშვილი წარმოშობით ქობულეთის მუნიციპალიტეტის სოფელ ქვედა სამების მკვიდრია. ქონებრივი დეკლარაციის მიხედვით, სულხან თამაზაშვილს ჰყავს მეუღლე და ორი შვილი. 2017 წელს მან მემკვიდრეობის სახით მიიღო სახლი სოფელ ქვედა სამებაში, რომლის 50%-იანი წილის მფლობელია.
2011 წელს, ნასყიდობის ხელშეკრულებით, სულხან თამაზაშვილმა ბინა შეიძინა თბილისში, ნუცუბიძის ქუჩაზე, რომლის 100%-იანი წილის მფლობელია. ბინის ღირებულება, ქონებრივი დეკლარაციის თანახმად, 50 000 ლარია.
2019 წელს, სულხან თამაზაშვილმა მემკვიდრეობის სახით მიიღო მიწის ნაკვეთი, რომლის 50%-იანი წილის მფლობელია. ამავე დეკლარაციის თანახმად, მეუღლის, თამარ ნარიმანიძის სახელზე ფიქსირდება აგარაკი წავკისში, რომელიც მას 2016 წელს მემკვიდრეობით გადასცეს.
ინფორმაციისთვის: აჭარის მთავრობის არალეგიტიმურმა თავმჯდომარემ გადადგომის შესახებ საზოგადოებას სოციალური ქსელით აცნობა. თორნიკე რიჟვაძემ მადლობა გადაუხადა „ქართული ოცნების“ ლიდერებს, ასევე, მხარდამჭერებს და აღნიშნა, რომ რჩება პარტიის ერთგულ წევრად.
“მივიღე გადაწყვეტილება აჭარის ავტონომიური რესპუბლიკის მთავრობის თავმჯდომარის თანამდებობის დატოვების შესახებ. მეშვიდე წელია ვიკავებ აღნიშნულ პოზიციას. დროა სიახლის და მინდა წარმატება ვუსურვო მომავალ თავმჯდომარეს. მინდა მადლობა გადავუხადო ,,ქართული ოცნების” დამფუძნებელს, ბატონ ბიძინა ივანიშვილს, შესაძლებლობისთვის მემსახურა ჩემი კუთხისთვის. მადლობა მინდა გადავუხადო საქართველოს პრემიერ-მინისტრს ბატონ ირაკლი კობახიძეს, საქართველოს პრეზიდენტს, ბატონ მიხეილ ყაველაშვილს მთავრობის თავმჯდომარეობის პერიოდში გაწეული მხარდაჭერისთვის. მადლობა თითოეულ თანამშრომელს, პარტიის წევრებს, გუნდს. განსაკუთრებული მადლობა აჭარის მოსახლეობას გამოცხადებული ნდობისთვის. ვრჩები ,,ქართული ოცნების”ერთგულ ჯარისკაცად და დარწმუნებული ვარ არაერთი დიდი გამარჯვება გველის წინ,” – წერს სოციალურ ქსელში თორნიკე რიჟვაძე.
რა კაპიტალი ჰქონდა თანამდებობამდე თორნიკე რიჟვაძეს და რა აქვს ახლა
ცნობისთვის: აჭარის უმაღლესი საბჭოს თვითგამოცდადებულმა თავმჯდომარემ, დავით გაბაიძემ აჭარის ტელევიზიასთან საუბრისას განაცხადა, რომ მთავრობის თავმჯდომარის დასამტკიცებლად, “ქართული ოცნების” პრეზიდენტი, მიხეილ ყაველაშვილი საბჭოსთან კონსულტაციებს გამართავს.
“აჭარის ავტონომიური რესპუბლიკის მთავრობის უფლებამოსილების შეწყვეტიდან 2 კვირის ვადაში, საქართველოს პრეზიდენტი უმაღლეს საბჭოში წარმოდგენილ პოლიტიკურ სუბიექტებთან კონსულტაციის შემდეგ, უმაღლეს საბჭოს დასამტკიცებლად წარუდგენს აჭარის ავტონომიური რესპუბლიკის მთავრობის თავმჯდომარის კანდიდატურას და მთავრობის თავმჯდომარეობის კანდიდატის მიერ დასახელებულ მინისტრების კანდიდატურებს. აჭარის ავტონომიური რესპუბლიკის მთავრობის დამტკიცებას კენჭი ეყრება ერთიანად. აჭარის ავტონომიური რესპუბლიკის მთავრობა დამტკიცებულად ითვლება, თუ მას მხარს დაუჭერს უმაღლესი საბჭოს სრული შემადგენლობის უმრავლესობა,” – განაცხადა დავით გაბაიძემ აჭარის მაუწყებელთან.
