ფინანსთა სამინისტროს შემოსავლების სამსახურის ინფორმაციით, საბაჟო გამშვებ პუნქტ „სარფზე“ თურქეთის რესპუბლიკიდან შემოტანილი 48 ტონა სათესლე კარტოფილის ტრანსპორტირება შეჩერდა. პროდუქტი საქართველოს ფიტოსანიტარიულ მოთხოვნებს ვერ შეესაბამებოდა, რის გამოც მისი განადგურების გადაწყვეტილება მიიღეს.
სასაზღვრო-საკარანტინო კონტროლის პროცესში აღმოჩნდა, რომ კარტოფილის პარტიებს არ გააჩნდათ ჯიშის იდენტიფიცირებისთვის აუცილებელი ეტიკეტები. გარდა ამისა, ტუბერებზე ფიქსირდებოდა ობისა და ლპობის ნიშნები, ხოლო პროდუქტში აღმოჩენილი ნიადაგის რაოდენობა დასაშვებ ზღვარს აჭარბებდა.
საქართველოს მთავრობის 2019 წლის 20 სექტემბრის №463 დადგენილების საფუძველზე, აღნიშნული პროდუქტი ფიტოსანიტარიული რისკების თავიდან აცილების მიზნით განადგურდება.
