შინაგან საქმეთა სამინისტროს ცნობით, აჭარის პოლიციის დეპარტამენტის ბათუმის საქალაქო სამმართველოს თანამშრომლებმა განსაკუთრებით დიდი ოდენობით ფსიქოტროპული ნივთიერების უკანონო, ჯგუფურად შეძენა-შენახვის ბრალდებით ორი პირი – თურქეთის რესპუბლიკის მოქალაქეები, 1998 წელს დაბადებული ა.ჩ. და 1988 წელს დაბადებული ე.ს. დააკავეს.
ბრალდებულები თბილისი-სენაკი-ლესელიძის ავტომაგისტრალზე გადაადგილებისას შეაჩერეს. პოლიციამ მათი პირადი ჩხრეკისა და ავტომანქანის დათვალიერების შედეგად ნივთმტკიცებად ამოიღო „პრეგაბალინის“ შემცველი კაფსულები, განსაკუთრებით დიდი ოდენობით.
შსს-ს ინფორმაციით, საქმეზე გამოძიება საქართველოს სისხლის სამართლის კოდექსის 261-ე მუხლით მიმდინარეობს, რაც 12 წლამდე თავისუფლების აღკვეთას ითვალისწინებს.
