ბათუმში, ფიროსმანის ქუჩაზე, ერთი კორპუსის ორ ფლიგელს შორის არსებულ სივრცეში მოწყობილი აივნები დაიბზარა. ნაპრალები იმდენად დიდია, რომ მათი დანახვა შორიდანაც შესაძლებელია. ადგილობრივების თქმით, აივნები კორპუსის ორ ნაწილს შორის არსებულ სივრცეშია მოწყობილი.
კორპუსის ამხანაგობის თავმჯდომარის განმარტებით, შენობა ორ ნაწილად არის გაყოფილი ე.წ. სეისმური ნაკერით, რომელიც კორპუსის ბლოკებს ერთმანეთისგან დამოუკიდებლად მოძრაობის საშუალებას აძლევს.
თუმცა, კითხვაზე, რატომ მოეწყო აივნები სწორედ კორპუსის ორ ნაწილს შორის არსებულ თავისუფალ სივრცეში და რამდენად შეესაბამება მათი მოწყობა შენობის კონსტრუქციულ თავისებურებებს, ამხანაგობის თავმჯდომარე პასუხს ვერ გვცემს და განმარტებისთვის ბათუმის მერიაში გვამისამართებს.
ბათუმის მერიაში „აჭარა თაიმსს“ განუმარტეს, რომ ფიროსმანისა და ჯავახიშვილის ქუჩების კვეთაზე კომპანია „ანაგის“ მიერ აშენებული ორი კორპუსის შეერთების ადგილზე ბჟენია მოწყობილი, ხოლო ზედა სართულებზე დატოვებულია ტემპერატურული ნაკერი, რომელიც ნაგებობას ცალკეულ, ერთმანეთისგან დამოუკიდებელ ბლოკებად ყოფს.
მერიის განმარტებით, ასეთი ნაკერი აუცილებელია, რათა შენობის სხვადასხვა ნაწილმა შესაძლო განსხვავებული ჩაჯდომისა და ტემპერატურული ცვლილებებით გამოწვეული მოძრაობის შემთხვევაში ერთმანეთზე ზეწოლა არ მოახდინოს.
„ბათუმში ფიროსმანისა და ჯავახიშვილოს ქუჩების კვეთაში, კომპანია „ანაგის“ მიერ დამოუკიდებლად აშენებული ორი კორპუსის ერთმანეთთან შეერთების ბჟენის ადგილია. რაც შეეხება ზემო სართულებს, ბზარი არ არის, ტემპერატურული ნაკერია დატოვებული, რომელიც ყოფს ნაგებობას ცალკეულ დამოუკიდებელ ბლოკებად/შენობებად. ტემპერატურული ნაკერი წარმოადგენს შენობის კონსტრუქციულ ელემენტს, რომელიც ყოფს ნაგებობას ცალკეულ დამოუკიდებელ ბლოკებად/შენობებად. თუ შენობის სხვადასხვა ნაწილს აქვს განსხვავებული სართულიანობა ან გრუნტის განსხვავებული მზიდუნარიანობა, ნაკერი საშუალებას აძლევს ბლოკებს/შენობებს ჯდომა განახორციელონ ერთმანეთისგან დამოუკიდებლად. ასევე ტემპერატურის ცვლილებისას სამშენებლო მასალები განიცდიან გაფართოებას ან შეკუმშვას ტემპერატურული ნაკერი უზრუნველყოფს ამ მოძრაობის თავისუფლებასაც. ორივე შენობა განსხვავებულად ჯდება გრუნტში გამომდინარე აქედან ბჟენი უნდა იყოს დეფორმირებადი, რათა არ შეზღუდოს ეს მოძრაობა,“ – მოგვწერეს ბათუმის მერიიდან
