პარტია „თავისუფლების მოედნის“ აჭარის ეროვნული კამპანია ოფიციალურად ბრიფინგით გაიხსნა. კამპანია 25 აპრილიდან 2 მაისის ჩათვლით გაგრძელდება და მისი ფარგლებში პარტიის წარმომადგენლები აჭარის ყველა მუნიციპალიტეტს – ბათუმს, ქობულეთს, ხელვაჩაურს, ქედას, შუახევსა და ხულოს, მათ შორის სოფლებსაც მოივლიან.
პარტიის განცხადებით, ვიზიტების მიზანია ადგილობრივ მოსახლეობასთან უშუალო კომუნიკაცია, მათი პრობლემების, საჭიროებებისა და მოთხოვნების გაცნობა და ადგილზე არსებული გამოწვევების შესწავლა. „თავისუფლების მოედნის“ თავმჯდომარის, ლევან ცუცქირიძის თქმით, გუნდი ცდილობს რაც შეიძლება მეტ მოქალაქეს შეხვდეს და მათი მოსაზრებები მომავალ პოლიტიკურ გეგმად გარდაქმნას.
მისივე შეფასებით, როგორც აჭარა, ისე საქართველო, „იზოლაციასა და კრიზისულ მდგომარეობაში იმყოფება“, რაზეც პასუხისმგებლობას მოქმედ ხელისუფლებას აკისრებს.
ბრიფინგზე პარტიის წარმომადგენლებმა ყურადღება გაამახვილეს იმ საკითხებზე, რომლებიც, მათი შეფასებით, პირდაპირ აისახება მოსახლეობის ყოველდღიურ ცხოვრებაზე. მათ შორის დასახელდა:
- აჭარის მთავრობის თავმჯდომარის პოსტზე ზურაბ პატარაძის დანიშვნა;
- ბათუმსა და გონიოში ზღვის ტერიტორიის მიწად რეგისტრაციის საკითხი;
- ბათუმის ღია ნაგავსაყარი და ეკოლოგიური მდგომარეობა;
- ინფრასტრუქტურული ტენდერების გამჭვირვალობა და გზების მდგომარეობა;
- ბულვართან დაკავშირებული ცვლილებები და მცირე და საშუალო ბიზნესის მდგომარეობა;
- ურბანული დაგეგმარების პრობლემები;
აჭარის რეგიონული ორგანიზაციის ხელმძღვანელის, აზა გაბუნიას განცხადებით, კამპანიის ფარგლებში პარტიის გუნდი ყველა მუნიციპალიტეტსა და მაღალმთიან სოფელს ეწვევა და მოქალაქეებს მოუწოდებს, აქტიურად გაუზიარონ საკუთარი პრობლემები.
კამპანიის პერიოდში ბათუმში, მემედ აბაშიძის გამზირის №48-ში მდებარე პარტიის ოფისი დაინტერესებული მოქალაქეებისთვის ღია იქნება.
აჭარის კამპანია 2 მაისს დასრულდება სამოქალაქო ფორუმით „საქართველოს გულისთვის აჭარა“, რომელიც „თავისუფლების მოედნისა“ და „საქართველოს საზოგადოებრივი ასამბლეის“ ორგანიზებით გაიმართება. ფორუმზე მონაწილეები იმსჯელებენ აჭარისა და ქვეყნის განვითარების ხედვებზე მომდევნო წლებისთვის.
