კახა ბოლქვაძე და თეონა გეგიძე
რამდენიმე დღის წინ სახელმწიფო უსაფრთხოების სამსახურმა გაავრცელა ინფორმაცია, რომ ქობულეთში ქრთამის აღების ბრალდებით ერთი პირი დააკავეს.
სუს-ის ანტიკორუფციული სააგენტოს დირექტორის განცხადებით, აღნიშნულმა საჯარო მოხელემ ქობულეთში, დავით აღმაშენებლისა და თამარ მეფის ქუჩების მიმდებარედ სახელმწიფოს საკუთრებაში არსებულ ორ მიწის ნაკვეთზე იჯარის გაფორმების სანაცვლოდ მოქალაქეს 3 000 ლარს სთხოვდა. გამოძიების ინფორმაციით, მან აღნიშნული თანხიდან ეტაპობრივად 2 000 ლარი უკვე მიიღო.
„აჭარა თაიმსმა“ გაარკვია, რომ ბრალდებული პირი არის კახა ბოლქვაძე – აჭარის უმაღლესი საბჭოს აპარატისა და „ქართული ოცნების“ დეპუტატ, ცოტნე ანანიძის სამაჟორიტარო ბიუროს ყოფილი თანამშრომელი.
ასევე, „აჭარა თაიმსმა“ გაარკვია ისიც, რომ იჯარაზე თანხმობის გამცემი კომისიის ერთ-ერთი წევრი იყო კახა ბოლქვაძის მეუღლე, თეონა გეგიძე, რომელიც ამავე დროს ქობულეთის მერიის იურიდიული განყოფილების უფროსია. მიზანშეწონილობის კომისიას კი ქობულეთის ყოფილი მერი, მირიან ქათამაძე ხელმძღვანელობდა.
გამოძიების ფარგლებში გამოიკითხა თუ არა ქობულეთის მერიის იურიდიული განყოფილების უფროსი თეონა გეგიძე ჩვენთვის უცნობია. ორი დღის განმავლობაში კომენტარის მიღება ვერ შევძელით. ასევე გაურკვეველი დარჩა, ჰქონდა თუ არა მას ინფორმაცია მეუღლის შესაძლო დანაშაულებრივ განზრახვაზე, სანამ ის მოქალაქესთან ფინანსური გარიგებაში შევიდოდა. კითხვებზე პასუხი ვერ მოგვაწოდა ქობულეთის მუნიციპალიტეტის პრესსამსახურმაც – მათ ვერ უზრუნველყვეს მერის პოზიციის მოწოდებაც.
„აჭარა თაიმსის“ ინფორმაციით, კახა ბოლქვაძემ საპატიმრო დაწესებულება გირაოს სანაცვლოდ უკვე დატოვა.
