ამ წუთებში, ბათუმში, ზვიად გამსახურდიას ქუჩაზე მცხოვრებლები აქციას მართავენ. ადგილობრივები ამავე ქუჩაზე, პროსტიტუციისთვის ფართის გადაცემას ეწინააღმდეგებიან. მათი თქმით, ღამით, ობიექტის მიმდებარედ ხმაური და უცხო პირთა სიმრავლეა, რის გამოც დისკომფორტული გარემოა შექმნილი.
აქციის მონაწილეებმა AJARATIMES.GE-ის განუცხადეს, რომ არალეგალური პროსტიტუციის ფაქტზე პოლიციას რამდენჯერმე მიმართეს, თუმცა სამართალდამცავების მხრიდან სრული იგნორია. ადგილობრივების ინფორმაციით, კომერციული ფართი, სადაც სექსმუშაკები კაცებს მომსახურებას სთავაზობენ ბათუმელ, ცნობილ ბიზნესმენს ეკუთვნის.
“ობიექტის მეპატრონეს, ასევე, პოლიციასაც მივმართეს, თუმცა არავინ გვაქცევს ყურადღებას. გაუსაძლისი მდგომარეობაა მიმდებარე ტერიტორიაზე. ამ ყველაფერს ბავშვები ხედავენ. გარდა ამისა, პოლიციას ხომ უნდა ჰქონდეს რეაგირება ამ უკანონობაზე,” – აცხადებს ერთ-ერთი ადგილობრივი, რომელიც მეზობლებთან ერთად, საპროტესტო აქციას მართავს.
ინფორმაციისთვის: საქართველოს კანონმდებლობით პროსტიტუციის წინააღმდეგ ბრძოლა პოლიციის ვალდებულებაა, თუმცა ძველ ბათუმში არსებული ვითარების ფონზე შეიძლება ითქვას, რომ პროცესის კონტროლი შსს ინტერესებში არ შედის.
