სახელმწიფო აუდიტის სამსახურმა ხულოს მუნიციპალიტეტის 2022-2023 წლების საქმიანობის შესაბამისობის აუდიტი ჩაატარა, რომლის შედეგადაც მუნიციპალიტეტის მართვისა და ფინანსური კონტროლის სისტემაში რიგი ხარვეზები გამოვლინდა.
აუდიტის დასკვნის მიხედვით, პრობლემები გამოვლინდა სახელმწიფო შესყიდვების პროცესში. კერძოდ, მუნიციპალიტეტის შიდა კონტროლის სისტემამ სათანადოდ ვერ უზრუნველყო შესყიდვების პროცედურების სწორად წარმართვა. შედეგად, მუნიციპალურ სერვისებს ხელშეკრულება გაუფორმდა მიმწოდებელთან, რომელიც სატენდერო პირობებს ვერ აკმაყოფილებდა. ასევე, მერიის მიერ ხელშეკრულებებში განხორციელებული ცვლილებების ნაწილი დაუსაბუთებელია, რამაც სამუშაოების დადგენილ ვადებში შეუსრულებლობა გამოიწვია.
აუდიტის ანგარიშში საუბარია ტრანსპორტის მოვლა-შენახვისა და საწვავის ხარჯვის მიმართულებით არსებულ ნაკლოვანებებზეც. დოკუმენტის მიხედვით, მუნიციპალიტეტში არსებული შიდა კონტროლის სისტემა ვერ უზრუნველყოფს ავტოსატრანსპორტო საშუალებებისა და სპეციალური ტექნიკისთვის შეძენილი სათადარიგო ნაწილების, მომსახურებისა და საწვავის ხარჯვის მიზნობრივად დოკუმენტურად დადასტურებას.
ხარვეზები გამოვლინდა აქტივების მართვის პროცესშიც. კერძოდ, მუნიციპალიტეტის იურიდიული პირების ნაწილში რეგულაციების შესაბამისად ინვენტარიზაცია არ ჩატარებულა. აუდიტის თანახმად, აქტივებზე სათანადო კონტროლის არარსებობა, მათ შორის, მუნიციპალიტეტის მიერ ა(ა)იპ „ხულოს მუნიციპალურ სერვისზე“ თხოვების ფორმით გადაცემულ 97 600 ლარის ღირებულების აქტივებზე, ქმნის მათი დაკარგვის ან ვარგისი ქონების ჩამოწერის რისკს.
» ხულოს მერიის თანამშრომელი ქრთამის აღების ფაქტზე დააკავეს
დოკუმენტში ასევე აღნიშნულია, რომ მუნიციპალიტეტში სათანადოდ არ ფუნქციონირებს ფაქტობრივად ნამუშევარი დროის აღრიცხვის სისტემა, რაც ხელფასის სწორად დარიცხვის ერთ-ერთი მთავარი საფუძველია. აუდიტის შეფასებით, აღნიშნული გარემოება მიუთითებს საბიუჯეტო სახსრების ხარჯვასთან დაკავშირებული კონტროლის მექანიზმების სისუსტეზე.
» სუს-მა ქობულეთსა და ხულოში კორუფციული დანაშაულების ფაქტზე რამდენიმე პირი დააკავა
სახელმწიფო აუდიტის სამსახურის დასკვნით, მუნიციპალიტეტის შიდა კონტროლის სისტემა სრულყოფილად ვერ უზრუნველყოფს ფინანსების მართვის გაუმჯობესებას, ინფრასტრუქტურული პროექტების შესრულების ეფექტიან მონიტორინგს და საბიუჯეტო სახსრების მიზნობრივ ხარჯვას.
