საგამოძიებო მოქმედებების შედეგად, სამართალდამცველებმა ჯგუფურად ჩადენილი გამოძალვისა და იძულების ფაქტზე სამი პირი – 1995 წელს დაბადებული ნ.ც., 1993 წელს დაბადებული ლ.ა. და წარსულში ნასამართლევი 1991 წელს დაბადებული გ.ლ. დააკავეს.
გ.ლ.-ს და ნ.ც.-ს ბრალად ედებათ დიდი ოდენობით ქონების მიღების მიზნით ჯგუფურად ჩადენილი გამოძალვა და იძულება, ხოლო ლ.ა.-ს იმავე დანაშაულში თანამონაწილეობა, იძულების გარეშე.
შსს-ს ინფორმაციით, გამოძიებით დადგინდა, რომ გ.ლ.-მ ფინანსური დავის საფუძველზე, უცხო ქვეყნის მოქალაქისგან 150 000 აშშ დოლარის გამოძალვა განიზრახა და ამის სისრულეში მოყვანას თანამზრახველების დახმარებით ცდილობდა. ბრალდებულები დაზარალებულს თანხის გადაცემას ძალადობითა და მუქარით აიძულებდნენ, როგორც თბილისში, ასევე ბათუმში.
გამოძიების მასალებით ირკვევა, რომ ფულის გამოძალვის მიზნით ბრალდებულები დაზარალებულს და მის მეგობარ გოგონას პირადი ცხოვრების ამსახველი მასალის გასაჯაროებითაც ემუქრებოდნენ.
“კომპლექსურად ჩატარებული ოპერატიულ-სამძებრო და საგამოძიებო ღონისძიებების შედეგად, გ.ლ., ნ.ც. და ლ.ა. სამართალდამცველებმა ბრალდებულების სახით დააკავეს. გრძელდება ოპერატიულ-სამძებრო და საგამოძიებო მოქმედებები საქმეში შესაძლო სხვა მონაწილეთა დადგენა-დაკავების მიზნით.
გამოძიება სისხლის სამართლის კოდექსის 181-ე (გღOUPურად ჩადენილი გამოძალვა) და 150-ე (იძულება) მუხლებით მიმდინარეობს, რაც 7 წლამდე ვადით თავისუფლების აღკვეთას ითვალისწინებს,” – წერია შსს მიერ გავრცელებულ ინფორმაციაში.
