„დინამო ბათუმმა“ ეროვნული ლიგის მე-17 ტურის დაძაბულ მატჩში „გორის დილა“ 3:2 დაამარცხა და მნიშვნელოვანი სამი ქულა მოიპოვა.
ბათუმელებმა ანგარიში შეხვედრის მეცხრე წუთზე პენალტით გახსნეს, თერთმეტმეტრიანი ზუსტად ნიკა კალანდარიშვილმა შეასრულა. პირველი გოლის შემდეგ „თოლიებმა“ მცირე დროში, მე-11 წუთზე, მეორე ბურთიც გაიტანეს, გოლის ავტორი მანდრიჩენკო გახდა.
„გორელები“ მარტივად დანებებას არ აპირებდნენ, შეხვედრის 36-ე წუთზე ოლატუნჯიმ შორი დარტყმით ანგარიში 2:1 გახადა, ხოლო 84-ე წუთზე ანოფმა „დილას“ მეორე გოლი გაუტანა. თუმცა გაშვებული ბურთის შემდეგ „ბათუმელებმა“ მეტოქეს ახალი ინტენსივობით შეუტიეს და 87-ე წუთზე პენალტი მოიპოვეს, რომელიც კვლავ წარმატებით ნიკა კალანდარიშვილმა შეასრულა.
აღსანიშნავია, რომ „თოლიები“ 56-ე წუთიდან 10 კაცით თამაშობდნენ, რადგან „ბათუმელების“ მეკარემ, ლაზარე კუპატაძემ, საჯარიმოს გარეთ ხელით თამაშის გამო წითელი ბარათი მიიღო.
„დინამო ბათუმი“ ეროვნული ლიგის მომდევნო შეხვედრას 17 ივნისს გამართავს, მე-18 ტურში „თოლიები“ სტუმრად „ქუთაისის ტორპედოს“ დაუპირისპირდებიან.
ავტორი: დიმიტრი გორგილაძე
