სამოქალაქო აქტივისტი ციალა ქათამიძე, რომელიც ანტირუსულ საპროტესტო აქციებში აქტიურად მონაწილეობს, სამხედრო რეზერვიდან გაათავისუფლეს. ქათამიძის განცხადებით, მან დღეს, 12 აპრილს, მიიღო ოფიციალური ბრძანება, რომლის მიხედვითაც ის საქართველოს თავდაცვის ძალების ეროვნული გვარდიის რეზერვში აღარ ირიცხება. ქათამიძის თქმით, ბრძანებას ხელს აწერს გენერალ-მაიორი გიორგი მათიაშვილი.
„დღეს ჩავიბარე ბრძანება, თანამდებობიდან და სამხედო სამსახურიდან გათავისუფლების შესახებ. ანუ, მარტივად რომ ვთქვა, დღეს მე, საქართველოს მოქალაქეს, რეზერვისტს, რომლის ერთ-ერთი მთავარი მოვალეობაც, საგანგებო ან საომარი მდგომარეობის დროს არის საქართველოს ტერიტორიული მთლიანობის ფიზიკურად დაცვა, „ქართულმა ოცნებამ“ ამიკრძალა მქონდეს პატივი, საჭიროების შემთხვევაში, იარაღით ხელში ვემსახურო საკუთარ ქვეყანას! ამაზე დიდი შეურაცხყოფა, 38 წლის ვარ და ჩემთვის არასდროს არავის მოუყენებია.
ირგვლივ გამეფებული უკანონობისა და უსამართლობის, ათეულობით სინდისის პატიმრის, ასეულობით სასტიკად ნაცემი ადამიანის, ასეულობით გათავისუფლებული და ათასობით დაშინებული საჯარო მოხელის ფონზე, მსგავსი უკანონო, უსამართლო თუ დისკრიმინაციული ფაქტები, ჩემს ცხოვრებაში ალბათ ბევრი იქნება, ვიცი, მაგრამ არ მეშინია!
არ მეშინია, რადგან ზუსტად ვიცი, რომ ჩემი პროფესიული საქმიანობის მთავარი მიზანი, როგორც სამოქალაქო, ასევე სამხედრო ცხოვრებაში იყო, არის და იქნება ერთი, – ვემსახურო საქართველოს. თამამად, ამაყად, გულწრფელად, ყველა ეროვნული გმირის წინაშე, ღვთისა და ერის წინაშე, შემიძლია ვთქვა, რომ ვემსახურები საქართველოს!“ – დაწერა სოციალურ ქსელშ ციალა ქათამიძემ.
ინფორმაციისთვის: სამოქალაქო აქტივისტი რეზერვის წევრი 2022 წლის 14 სექტემბრიდან იყო. ციალა ქათამიძე მიჩნევს, რომ სამხედრო რეზერვიდან მისი სამოქალაქო პოზიციისა და აქციებში მონაწილეობისთვის გაათავისუფლეს. ქათამიძის განმარტებით, გარდა სამხედრო სამსახურის შეწყვეტისა, მას 2 000 ლარიანი ჯარიმაც დაეკისრა. ქათამიძე გადაწყვეტილების გასაჩივრებას გეგმავს.
